IZaga 29

₁Umuntu othi esolwa abe nenkani,

uyochotshozwa ngokuphazima kweso,

akayukuhlengwa muntu.

₂Abantu bayathokoza ngokwanda kwabalungileyo,

kodwa bayakhononda ngokubusa kwesikhohlakali.

₃Umuntu othanda ukuhlakanipha uthokozisa uyise,

kepha ongumngani wezifebe

usaphaza imfuyo yakhe.

₄Inkosi iyalimisa izwe layo ngobulungiswa;

umuntu olithelisayo ulicekela phansi.

₅Umuntu oyenga umakhelwane wakhe

wendlala inetha ezinyaweni zakhe.

₆Ugibe lusesiphambekweni somuntu omubi,

kodwa olungileyo uhlabelela ngentokozo.

₇Olungileyo uyalazi ilungelo lompofu,

kodwa omubi akaqondi lutho.

₈Izedeleli ziyawushisa umuzi,

kodwa abalungileyo bayaludambisa ulaka.

₉Uma ohlakaniphileyo ephikisana nesiwula

siyadlova, sihleke,

kungabi bikho ukuthula.

₁₀Abantu abathanda ukuchitha igazi

bayabazonda abamsulwa,

kodwa abaqotho bayakuvikela

ukuphila kwakhe.

₁₁Isiwula sikhipha lonke ulaka lwaso,

kepha ohlakaniphileyo uyalugodla

kuze kube sekugcineni.

₁₂Uma umbusi elalela indaba yamanga,

zonke izikhulu zakhe ziyakhohlakala.

₁₃Ompofu nocindezelayo bayafana;

nguSimakade owenza

ukuba bobabili amehlo abo abone.

₁₄Inkosi eyehlulela abampofu ngeqiniso,

isihlalo sayo sobukhosi siyakuma phakade.

₁₅Uswazi nokusola kunika ukuhlakanipha,

kepha umntwana oyekwayo uyakuhlaza unina.

₁₆Lapho zanda izikhohlakali, kwanda iziphambeko,

kepha abalungileyo bayakubona ukuwa kwazo.

₁₇Yiyale indodana yakho,

khona iyokuphumuza,

yebo, iwuthokozise umphefumulo wakho.

₁₈Lapho kungekho mbono khona,

abantu baba wumhlambi kazalusile,

kodwa ubusisiwe ogcina umthetho.

₁₉Inceku ayisolwa ngamazwi nje,

ngokuba noma iqonda ayiyukulalela.

₂₀Uyambona umuntu oshesha ukukhuluma,

ungcono umuntu oyisiwula kunaye.

₂₁Inceku ekhuliswa ngokutotoswa kwasebuntwaneni,

isiphetho sayo siyoba sibi.

₂₂Umuntu onolaka udala ingxabano,

nalowo onesififane ubanga ukuphambuka okukhulu.

₂₃Impakamo yomuntu iyomqumba phansi,

kepha onomoya othobekileyo uyazuza udumo.

₂₄Ohlanganyela nesela uzonda umphefumulo wakhe;

uzwa isifungo esibi ngomunye,

kepha angasidaluli.

₂₅Ukwesaba abantu ngukuzibekela ugibe,

kepha owethemba uSimakade uyalondeka.

₂₆Abaningi bafuna umusa wombusi,

kepha ukwehlulelwa komuntu

kuvela kuSimakade.

₂₇Umuntu ongethembekile uyisinengiso kwabalungileyo,

nohamba ngobuqotho uyisinengiso kokhohlakele.