IZaga 7

₁Ndodana yami,

gcina amazwi ami,

uzilondele imiyalelo yami.

₂Gcina imiyalelo yami, uphile,

nemfundiso yami,

njengenhlamvu yeso lakho.

₃Kubophele eminweni yakho,

ukulobe esibhebheni senhliziyo yakho.

₄Yisho kukho ukuhlakanipha uthi:

“Wena ungudadewethu,”

ubize ukuqonda, ukubize ngokuthi

yisihlobo sakho,

₅ukuze kukuvikele kowesifazane ondindayo,

nakowezizwe onamazwi athophayo.

₆Ngisefasiteleni lendlu yami,

ngalunguza ngekhethini lami,

₇ngabona phakathi kwabangenalwazi,

ngabona phakathi kwabasha insizwa engenakuqonda,

₈idlula emgwaqweni eduze negumbi lakhe,

ibheke ngasendlini yakhe;

₉kwasekuhwelela kusihlwa,

esigayegayeni sobusuku nobumnyama.

₁₀Bheka, owesifazane wamhlangabeza

egqokise okwesifebe, ezembozile.

₁₁Uyaphishaphisheka akanakuthula;

izinyawo zakhe azivumi

ukuhlala endlini yakhe,

₁₂manje usesemigwaqweni,

nanguya esesezigcawini,

uyacutha emajikeni wonke.

₁₃Uyayibamba, uyayiqabula, engenamahloni,

uthi kuyo:

₁₄“Namuhla ngiyenzile iminikelo yokuthula;

ngazigcwalisa izithembiso zami.

₁₅Ngakho-ke ngiphumile ngizokuhlangabeza,

ngizofuna ubuso bakho,

manje sengikutholile.

₁₆Umbhede wami wendlalwe ngezindwangu zokwemboza,

nelineni laseGibhithe elinemishu.

₁₇Umbhede wami ngiwufafaze ngemure,

ngenhlaba nangekinamona.

₁₈Woza sizanelise ngothando kuze kuse;

sijabule ngokuthandana.

₁₉Indoda yami ayikho ekhaya;

ithathe uhambo olude.

₂₀Ithathe isikhwama semali ngesandla;

iyoze ibuye ekhaya ngokudilingana kwenyanga.”

₂₁Uyiphambukisa ngamazwi akhe amaningi ahehayo;

uyiyenga ngokuthopha kwezindebe zakhe.

₂₂Iyamlandela masinyane njengenkabi iya ekuhlatshweni

nanjengenyamazane ingena esihibeni;

₂₃uze umcibisholo uhlabe esibindini sayo;

isheshela ogibeni njengenyoni,

ingazi ukuthi lubekelwe ukuphila kwayo.

₂₄Ngakho-ke bantwana, ngizweni,

nilalele amazwi aphuma emlonyeni wami.

₂₅Inhliziyo yakho mayingaphambukeli ezindleleni zakhe,

ungahambi emikhondweni yakhe.

₂₆Ubawisile abaningi, bafa;

ubulele izindimbane.

₂₇Indlu yakhe iyindlela

eqonde endaweni yabafileyo,

eyehlela emakamelweni okufa.