AMahubo 105

₁Bongani uSimakade, nibize igama lakhe,

izenzo zakhe nizazise phakathi kwabantu.

₂Mhlabeleleleni, nimhubele,

nikhulume ngazo zonke izimangaliso zakhe.

₃Dumisani igama lakhe elingcwele,

mazithokoze izinhliziyo zabafuna uSimakade.

₄Mfuneni uSimakade namandla akhe,

nifunisise ubuso bakhe njalonjalo.

₅Khumbulani izimangaliso zakhe azenzileyo,

nezibonakaliso zakhe,

nezehlulelo zomlomo wakhe,

₆nina bozalo luka-Abhrahama, inceku yakhe,

nina bantwana bakaJakobe, abakhethiweyo bakhe.

₇Yena unguSimakade uNkulunkulu wethu,

izehlulelo zakhe zisemhlabeni wonke.

₈Kuyoze kube phakade

esikhumbula isivumelwano sakhe,

izwi ayala ngalo izizukulwane ngezizukulwane,

₉avumelana ngaso no-Abhrahama,

nesifungo asenza ku-Isaka,

₁₀wasiqinisa kuJakobe,

saba ngumthetho naku-Israyeli

saba yisivumelwano esiphakade.

₁₁Wathi:

“Ngizokunika iKhanani,

libe yisabelo sefa lakho.”

₁₂Ngaleso sikhathi babeyingcosana ngenani,

yebo, babeseyingcosana,

futhi babengabafokazi kulo.

₁₃Bazulazula ezizweni ngezizwe,

besuka kulo mbuso,

beya kwabanye abantu.

₁₄Akavumelanga muntu ukubahlupha,

wajezisa amakhosi ngenxa yabo,

₁₅ethi:

“Ningabathinti abagcotshiweyo bami,

ningabalimazi abaphrofethi bami.”

₁₆Lapho ethumela indlala ezweni,

kwavaleka umthombo wokudla.

₁₇Wathumela indoda, yabendulela,

uJosefa owathengiswa waba yisigqila,

₁₈balimaza izinyawo zakhe ngamaketanga,

waboshwa ngensimbi.

₁₉Kwaze kwaba yisikhathi

elagcwaliseka ngaso izwi lakhe,

izwi likaSimakade lamhola.

₂₀Inkosi yathumela, yamkhulula,

umbusi wabantu wamdedela.

₂₁Wamenza umphathi wendlu yakhe,

nenduna yezinto zakhe zonke,

₂₂ukuze abophe izikhulu zakhe

ngokuthanda kwakhe,

afundise amalunga akhe ukuhlakanipha.

₂₃U-Israyeli wayesefika eGibhithe,

uJakobe wagogobala ezweni likaHamu.

₂₄USimakade wabenza banda kakhulu

abantu bakhe,

wabenza baba namandla kunezitha zabo.

₂₅Wayiguqula inhliziyo yabantu baseGibhithe,

babazonda abantu bakhe,

baziphatha ngobuqili izinceku zakhe.

₂₆Wathumela uMose inceku yakhe,

no-Aroni ayemkhethile.

₂₇Benza izibonakaliso nezimangaliso zakhe

phakathi kwabo, ezweni likaHamu.

₂₈Wabehlisela ngobumnyama, kwaba mnyama ezweni,

kepha baphambana namazwi akhe.

₂₉Waphendula amanzi abo aba yigazi,

wabhubhisa izinhlanzi zabo.

₃₀Izwe labo lagcwala amasele

nasezindlini zamakhosi abo.

₃₁Wakhuluma, kwavela izibawu

nomiyane emingceleni yabo yonke.

₃₂Wabanika isichotho saba yimvula yabo,

amalangabi omlilo ezweni lakubo.

₃₃Washaya nemivini yabo nemikhiwane yabo,

waphula imithi yasezweni labo.

₃₄Wakhuluma, kwavela isikhonyane

nezinkumbi ezingenakubalwa.

₃₅Zona zadla imifino yonke yezwe lakubo,

zaqothula nezithelo zomhlabathi wabo.

₃₆Washaya namazibulo wonke ezweni lakubo,

okokuqala kwamandla abo.

₃₇Abantu bakhe wayesebakhipha benesiliva negolide,

kungekho ontengezelayo emindenini yakubo.

₃₈IGibhithe lajabula ekuphumeni kwabo,

ngokuba ukwesaba kwabehlela.

₃₉Wendlala ifu lokubasibekela,

nomlilo wokubakhanyisela ebusuku.

₄₀Bacela, waletha izigwaca,

wabasuthisa ngesinkwa sasezulwini.

₄₁Wavula idwala, kwampompoza amanzi,

agobhoza ogwadule kwangathi ngumfula.

₄₂USimakade walikhumbula izwi lakhe elingcwele

no-Abhrahama, inceku yakhe.

₄₃Wayesebakhipha abantu bakhe bethokozile,

abakhethiweyo bakhe bahuba ngokwethaba.

₄₄Wabapha amazwe abezizwe,

badla umcebo wabezizwe,

₄₅ukuze baqaphele ukugcina izimiso zakhe

nemithetho yakhe.

Haleluya!