AMahubo 138

₁Ngiyokubonga ngenhliziyo yami yonke,

ngikuhubele phambi konkulunkulu.

₂Ngiyakukhuleka phambi

kwethempeli lakho elingcwele,

ngibonge iGama lakho,

ngenxa yomusa wakho neqiniso lakho,

ngokuba phezu kwakho konke,

uphakamisile iGama lakho nezwi lakho.

₃Ngosuku engakhala ngalo, wangiphendula;

waqinisa umoya wami,

ngaba namandla.

₄Wonke amakhosi omhlaba mawakubonge, Simakade,

ngokuba ezwile amazwi omlomo wakho.

₅Mawahlabelele ngezindlela zikaSimakade,

ngokuba inkulu inkazimulo kaSimakade.

₆Nakuba uSimakade ephakeme,

uyamnakekela ophansi;

ozidlayo umazi ekude.

₇Noma ngihamba ngikhungethwe ukuhlupheka,

uyongilondoloza,

uyokwelula isandla sakho

ungivikele olakeni lwezitha zami,

esokunene sakho singisindise.

₈USimakade uzoyifeza injongo yakhe ngami.

Simakade, umusa wakho umi phakade,

ungayishiyi imisebenzi yezandla zakho.