AMahubo 21

₁Simakade, inkosi iyethaba ngamandla akho;

ithokoza kakhulu ngokuyihlenga kwakho.

₂Uyiphe obekufiswa yinhliziyo yayo,

awuyigodlelanga ebikucela ngezindebe zomlomo wayo. Sela

₃Uyihlangabeze ngezibusiso ezinhle,

wayethwesa umqhele wegolide

elicwengekileyo ekhanda layo.

₄Yacela kuwe ukuphila, wayipha khona;

yaphila izinsuku eziningi,

kwaze kwaba ingunaphakade.

₅Inkulu inkazimulo yayo ngokuyinqobisa kwakho;

uyethwese udumo nobukhosi.

₆Ngokuba uyibeke ukuba ibe yisibusiso

kuze kube phakade;

uyenza ithokoze,

ijabule ngobukhona bakho.

₇Inkosi yethembele kuSimakade,

nangenxa yesihawu soPhezukonke ayiyukunyakaziswa.

₈Isandla sakho siyozifumana zonke izitha zakho;

esokunene sakho sibathole abakuzondayo.

₉Ngesikhathi sentukuthelo yakho,

uyobenza bafane nesithando somlilo.

USimakade uyobasobozela ngentukuthelo yakhe,

umlilo ubashwabadele.

₁₀Uzalo lwabo uyolubhubhisa emhlabeni,

nesizukulwane sabo, phakathi kwabantu.

₁₁Uma bekwakhela uzungu,

beceba okubi ngawe, abayukuphumelela;

₁₂ngokuba uyobaciba ngomcibisholo wakho bebuka,

bashaye bachithe.

₁₃Phakama ngamandla akho, Simakade.

Thina sizohlabelela, situse amandla akho.