AMahubo 30

₁Ngiyakuphakamisa Simakade,

ngokuba ungitakulile,

awuvumanga ukuba izitha zami

zithokoze ngami.

₂Simakade, Nkulunkulu wami,

ngikhale kuwe ngicela usizo,

wangiphulukisa.

₃Simakade ukhulule umoya wami

endaweni yabafileyo,

wangigcina ngiphilile,

angaze ngashona egodini.

₄Mdumiseni uSimakade, nina bathembekileyo bakhe,

nibonge igama lakhe elingcwele.

₅Ngokuba intukuthelo yakhe ingeyesikhashana,

umusa wakhe umi ingunaphakade.

Ukulila kungadonsa kuze kuhlwe;

injabulo iqhamuke ekuseni.

₆Mina ngathi lapho ngiphumelela:

“Angisoze nganyakaziswa naphakade.”

₇Simakade ngomusa wakho,

wangenza nganjengentaba eqinileyo.

Usubufihlile ubuso bakho, ngadangala.

₈Ngakhala kuwe Simakade,

nganxusa Nkosi yami, ngathi:

₉“Kunanzuzoni ukufa kwami,

lapho ngishona phansi egodini na?

Ngabe uthuli luzokudumisa yini na?

Ngabe luzokhuluma ngokwethembeka kwakho na?

₁₀Yizwa, Simakade,

ube nomusa kimi;

Simakade yiba ngumsizi wami!”

₁₁Ukulila kwami ukuphendule ijadu,

wangikhumula ingubo yesaka,

wangembathisa injabulo,

₁₂ukuze umphefumulo wami ukudumise, ungaphezi.

Simakade, Nkulunkulu wami,

ngizokubonga kuze kube phakade.