AMahubo 44

₁Nkulunkulu, sizwile

ngezindlebe zethu,

nokhokho bethu besitshela

lokho owakwenza

emihleni yabo,

emihleni yasemandulo.

₂Wena ngesandla sakho,

waxosha izizwe,

bona wabatshala;

wazibhubhisa izizwe,

bona wabakhulula.

₃Ngokuba abalidlanga izwe

ngenkemba yabo,

nengalo yabo ayibasindisanga,

kodwa kwaba yisandla

sakho sokunene

nengalo yakho,

nokukhanya kobukhona bakho,

ngokuba wethaba ngabo.

₄Wena uyiNkosi yami, Nkulunkulu,

yaleza ukunqoba kukaJakobe.

₅Ngawe sizakuzilahla

phansi izitha zethu,

ngegama lakho

sizakubanyathela abasivukelayo.

₆Ngokuba angethembele

emnsalweni wami,

nenkemba yami ayingisindisanga.

₇Kepha nguwe osisindisile

ezitheni zethu,

wabathela ngehlazo abasizondayo.

₈Sizincoma njalo

ngoNkulunkulu wethu,

silibonge igama lakho

ingunaphakade. Sela

₉Nokho usilahlile,

wasijabhisa,

futhi awusaphumi nezimpi zethu.

₁₀Usihlehlisela emuva esitheni,

abasizondayo bayaziphangela.

₁₁Usenze safana nezimvu

zokuhlatshwa,

wasihlakazela phakathi kwezizwe.

₁₂Isizwe sakho usithengise

ngenani eliphansi,

wangathola nzuzo ngaso.

₁₃Usenze isethuko

komakhelwane bethu,

inhlekisa nendumalo

kwabasiphahlileyo.

₁₄Usenze isaga kwabezizwe,

banikina amakhanda

phakathi kwabantu.

₁₅Usuku lonke,

ukudunyazwa kwami

kuphambi kwami,

ihlazo lemboze

ubuso bami

₁₆ngenxa yoklolodayo

nojivazayo,

nangenxa yesitha

nomphindiseleli.

₁₇Konke lokhu kusehlele,

kodwa akusenzanga

sakhohlwa nguwe,

asisephulanga isivumelwano sakho.

₁₈Izinhliziyo zethu azikufulathelanga,

izinyathelo zethu

aziphambukanga endleleni yakho,

₁₉kodwa usiphahlazele

endaweni yezimpungushe,

wasemboza ngethunzi lokufa.

₂₀Uma singakhohlwa yigama

likaNkulunkulu wethu,

noma izandla zethu

sizivulele unkulunkulu ongaziwa,

₂₁ngeke yini uNkulunkulu

azi ngalokho na?

Ngokuba Yena wazi

izimfihlo ezisenhliziyweni.

₂₂Ngenxa yakho, sibulawa

usuku lonke,

sifana nezimvu zokuhlatshwa.

₂₃Vuka, Nkosi!

Ulaleleni na?

Ungasilahli njalonjalo.

₂₄Ubufihlelani ubuso bakho,

ukhohlwe ukuhlupheka

nokucindezelwa kwethu na?

₂₅Ngokuba sibishe othulini;

imizimba yethu

inamathele emhlabathini.

₂₆Sukuma, usisize.

Sihlenge ngenxa

yomusa wakho.