AMahubo 56

₁Nkulunkulu, yiba nomusa kimi,

ngokuba abantu bafuna ukungenzakalisa.

Bangilwisa usuku lonke, bayangicindezela.

₂Izitha zami zingenzakalisa njalo,

ngokuba baningi abalwa nami ngokuqhosha.

₃Mhla ngesabayo ngiyokwethembela kuwe.

₄KuNkulunkulu engidumisa izwi lakhe,

kuNkulunkulu ngibeka ithemba lami, angiyukwesaba;

umuntu angangenzani na?

₅Usuku lonke bahlanekezela amazwi ami.

Yonke imicabango yabo ihlose ukungilimaza.

₆Bayangihlasela, bangicuthele,

baqaphe izinyathelo zami,

baqamekele umphefumulo wami.

₇Ungabavumeli baphunyule ngenxa yobubi babo,

ngentukuthelo, qumba phansi izizwe, Nkulunkulu.

₈Wena ukunakile ukuzulazula kwami,

izinyembezi zami zethe egabheni lakho.

Kanti azikho yini encwadini yakho na?

₉Izitha zami bese zibuyela emuva

mhla ngikhalayo,

ngiyakwazi lokhu, ukuthi uNkulunkulu unami.

₁₀KuNkulunkulu, engiyakulidumisa izwi lakhe,

kuSimakade, engiyakulidumisa izwi lakhe.

₁₁Ithemba lami likuNkulunkulu, angiyukwesaba.

Umuntu angangenzani na?

₁₂Nkulunkulu, izifungo zami zingibophezele kuwe,

ngiyakunikela kuwe iminikelo yokubonga.

₁₃Ngokuba umphefumulo wami uwukhulule ekufeni,

nezinyawo zami, ekukhubekeni,

ukuze ngihambe phambi kukaNkulunkulu,

ekukhanyeni kwabaphilayo.