AMahubo 67

₁UNkulunkulu makabe nomusa kithi, asibusise,

makakhanyise ubuso bakhe phezu kwethu, Sela

₂ukuze indlela yakho yaziwe emhlabeni,

insindiso yakho, kubo bonke abezizwe.

₃Abantu mabakubonge, Nkulunkulu,

ubongwe ngabantu bonke.

₄Izizwe mazijabule, zihube ngentokozo,

ngokuba abantu ubehlulela ngokulunga,

uhole izizwe emhlabeni. Sela

₅Abantu mabakubonge, Nkulunkulu,

ubongwe ngabantu bonke.

₆Umhlaba uthele izithelo zawo,

uNkulunkulu wethu usibusisile.

₇Sengathi uNkulunkulu angaqhubeka asibusise,

yonke imikhawulo yomhlaba imesabe.