AMahubo 95

₁Wozani simhubele uSimakade,

silihlokomele ngenjabulo

idwala lensindiso yethu.

₂Masize phambi kwakhe ngokubonga,

simhubele amahubo.

₃Ngokuba uSimakade unguNkulunkulu omkhulu,

uyiNkosi enkulu ngaphezu konkulunkulu bonke.

₄Esandleni sakhe kukhona izinzulu zomhlaba,

neziqongo zezintaba ngezakhe nazo.

₅Ulwandle ngolwakhe,

walwenza, nomhlabathi owomileyo

wawubumba ngezandla zakhe.

₆Wozani sikhuleke, sikhothame,

siguqe phambi kukaSimakade, uMenzi wethu.

₇Ngokuba Yena unguNkulunkulu wethu,

thina singabantu bedlelo lakhe

nezimvu zesandla sakhe.

₈Ningayenzi lukhuni inhliziyo yenu njengaseMeribha,

njengasosukwini lwaseMasa, ehlane,

₉lapho okhokho benu bangilinga khona, bangivivinya,

bewubonile umsebenzi wami.

₁₀Iminyaka engamashumi amane,

nganengwa yileso sizukulwane, ngaze, ngathi:

“Bangabantu abanhliziyo zabo zidukile,

abangazazanga izindlela zami.”

₁₁Ngafunga ngabo olakeni lwami, ngathi:

“Abasoze bangena ekuphumuleni kwami.”