ISihlabelelo Sezihlabelelo 2

₁Ngiyimbali yaseSharoni,

nomnduze wezimfunda.

₂Njengomnduze phakathi kwameva,

sinjalo isithandwa sami

phakathi kwezintokazi.

₃Njengesihlahla samahhabhula

phakathi kwezihlahla ehlathini,

unjalo othandiweyo wami

phakathi kwezinsizwa.

Emthunzini wakhe,

ngahlala phansi ngokwenama,

isithelo sakhe sasimnandi

emlonyeni wami.

₄Ungingenise endlini yewayini,

ibhanela lakhe,

phezu kwami, wuthando.

₅Ngondle ngamakhekhe anamagilebhisi omisiwe,

ungivuselele ngamahhabhula,

ngokuba ngiyafa wuthando.

₆Umkhono wakho wakwesokhohlo

ungumqamelo wekhanda lami

kuthi owangakwesokunene

ungigone ngawo.

₇Ngiyaniyala madodakazi

aseJerusalema

ngezimpala nemigakla;

ningaluvusi uthando kungakabi yisikhathi,

Luyekeni luziqubukele lona.

₈Yizwi lothandiweyo wami lelo!

Bheka, weqa izintaba,

ugxuma phezu kwamagquma.

₉Othandiweyo wami

ufana nensephe

noma isixhumo sendluzele.

Bheka, lona omi ngemuva

kodonga lwakwethu;

ugqolozele emafasiteleni,

upopola ngamakhethini.

₁₀Othandiweyo wami

waphendula wathi kimi:

“Vuka sithandwa sami,

simomondiya sami,

woza sihambe.

₁₁Ngokuba ubusika sebudlulile,

nemvula ayisekho, alisani;

₁₂umhlaba usuhlobe ngezimbali,

isikhathi sokuthena imivini sesifikile,

sekuzwakala nomsindo wokulilizela kwamajuba

ezweni lakithi.

₁₃Umkhiwane usuthelile,

amakhiwane aseluhlaza,

nemivini iyaqhakaza,

kuthaphuka iphunga layo.

Vuka sithandwa sami,

muhlekazi wami,

woza sihambe.”

₁₄Juba lami elisemifantwini yedwala

elisekusithekeni endaweni eyehlelayo,

mangikubone siqu sakho.

Mangizwe izwi lakho,

ngokuba izwi lakho limnandi,

nesiqu sakho siyabukeka.

₁₅Sibambeleni izimpungushe,

amazinyane azo

angazoni izivini,

ngokuba izivini zethu zisaqhakaza.

₁₆Othandiweyo wami ungowami,

nami ngingowakhe;

welusela phakathi kweminduze.

₁₇Kuze kuphole ilanga,

namathunzi abaleke,

phenduka wena

othandiweyo wami,

ufane nensephe

noma nesixhumo sendluzele

ezintabeni ezimakhelekehle.