ISihlabelelo Sezihlabelelo 7

₁Zaze zazinhle izinyawo zakho ezimbadadeni,

wena ndodakazi yesikhulu!

Amathanga akho ayizindilinga

anjengemihlobiso,

umsebenzi wezandla zengcweti.

₂Inkaba yakho iyisitsha esiyindilinga

esingalintuli iwayini elixutshiweyo,

isisu sakho simbulungene okwendundumana kakolo,

ebiyelwe ngeminduze.

₃Amabele akho amabili anjengamazinyane amabili,

amaphahla ayizixhumo zensephe.

₄Intamo yakho ifana nombhoshongo

wophondo lwendlovu,

amehlo akho afana namachibi aseHeshibhoni,

ngasesangweni eBhathi Rabhimi;

ikhala lakho linjengombhoshongo waseLebhanoni,

obhekene neDamaseku.

₅Ikhanda lakho linjengeKharimeli,

nomyeko okulo usabukhwebezane,

inkosi ibambeke njengomthunjwa emiyekweni.

₆Umuhle ngokubabazekayo wena sithandwa,

futhi uyangenamisa!

₇Isiqu sakho sifana nesihlahla sesundu,

namabele akho afana namahlukuzo alo.

₈Ngithi:

“Ngizokhwela esihlahleni sesundu,

ngibambelele emagatsheni aso.”

Ngiyakucela, sengathi isifuba sakho

singafana namahlukuzo omvini,

nephunga lokuphefumula kwakho

lifane namahhabhula,

₉nolwanga lwakho lufane newayini elihle,

elehla kabushelelezi kothandiweyo wami,

lewuka ezindebeni nasemazinyweni.

₁₀Mina ngingowothandiweyo wami,

naye uyangilangazelela.

₁₁Woza, wena othandiweyo wami,

siye endle,

silale emizaneni.

₁₂Masivuke ekuseni siye ezivinini,

siyobona ukuthi umvini usuqhakazile,

nezimbali zawo sezivulekile,

nokuthi amahananadi asekhahlele.

Kulapho ngiyokunikeza khona uthando lwami.

₁₃Amamandragora athaphuka iphunga elimnandi,

ngaseminyango yethu

kukhona zonke izinhlobo zezithelo zekhethelo,

ezintsha nezindala,

engizibekele wena, othandiweyo wami.