UZakhariya 2

₁Ngabheka, ngabona indoda iphethe esandleni intambo yokulinganisa. ₂Ngayibuza ngathi: “Uyakuphi na?”

Yathi kimi: “Ngiyakolinganisa iJerusalema, ngibone ukuthi bungakanani ububanzi balo, nokuthi bungakanani ubude balo.”

₃Ingelosi eyayikhuluma nami yaphuma-ke, kwathi enye ingelosi yeza ukuyihlangabeza. ₄Yathi kuyo: “Gijima utshele leya nsizwa ukuthi iJerusalema alisayukubiyelwa ngogange, ngenxa yobuningi babantu nemfuyo okukulo. ₅‘Kepha Mina, ngiyakuba lugange lomlilo kulo oluluzungeze ngimbi ci, futhi ngibe yinkazimulo kulo,’ kusho uSimakade.

₆“Maye! Maye, balekani enyakatho!” kusho uSimakade, “ngokuba nginihlakaze njengemimoya emine yezulu,” kusho uSimakade.

₇“Maye, phulukundlela, uye eZiyoni, wena ohlala nendodakazi yaseBhabhele!”

₈Ngokuba usho kanje uSimakade Wamabandla ongithumile ukuyolanda inkazimulo yakhe ezizweni ezaniphanga, ngokuba othinta nina usethinte inhlamvu yeso lakhe. ₉Niyabona-ke, impela ngiyakuphakamisa isandla sami phezu kwabo ngimelane nabo, bayakuba yimpango yezigqila zabo, niyokwazi ukuthi ungithumile uSimakade Wamabandla. ₁₀“Hlabelela ngokujabula, uthokoze, ndodakazi yaseZiyoni, ngokuba ngiyeza, ngiyakuhlala phakathi kwakho,” kusho uSimakade.

₁₁“Izizwe eziningi ziyakuzihlanganisa noSimakade ngalolo lusuku, zibe ngabantu bami; ngiyakuhlala phakathi kwakho, uyakukwazi ukuthi nguSimakade Wamabandla ongithume kuwe. ₁₂USimakade uyakudla uJuda abe yifa lakhe, nesabelo sakhe ezweni elingcwele, abuye alikhethe iJerusalema. ₁₃Thulani du, bantu nonke phambi kukaSimakade, ngokuba usesukile, waphuma endaweni yakhe engcwele.”