1 IZikhronike 14

₁Inkosi yaseThire, uHiramu, yathumela izithunywa kuDavide, imisedari, abakhi nababazi ukuba bayomakhela indlu. ₂UDavide waqonda ukuthi uSimakade wayembekile impela ukuba abe yinkosi kwa-Israyeli, ngokuba umbuso wakhe waphakanyiselwa phezulu ngenxa yabantu bakhe u-Israyeli.

₃UDavide eseseJerusalema wabuye wathatha abanye abafazi, wazala amanye amadodana namadodakazi. ₄Nanka amagama abantwana abazala eJerusalema: uShamuwa, uShobhabhi, uNathani, uSolomoni, ₅uJibhari, u-Elishuwa, u-Eliphelethi, ₆uNoga, uNefegi, uJafiya, ₇u-Elishama, uBheyeliyada no-Elifeleti.

₈Kwathi esezwile amaFilisti ukuthi uDavide ubekiwe ukuba abe yinkosi ka-Israyeli, akhuphuka ayomfuna; kuthe lapho uDavide ekuzwa lokho waphuma, wawahlasela. ₉AmaFilisti esegasele esigodini samaRefa, ₁₀uDavide wabuza kuNkulunkulu, wathi: “Ngenyuke yini ukuyohlasela amaFilisti na? Uyakuwanikela yini esandleni sami?”

USimakade wathi kuye: “Khuphuka, ngokuba ngiyakuwanikela esandleni sakho.”

₁₁Base bekhuphuka eBhali Pherazimu, uDavide wawabhubhisa. UDavide wathi: “UNkulunkulu uthelekele izitha zami ngesandla sami njengamanzi ebhodloza avinjwe ngakho.”

Yingakho-ke leyo ndawo bayiqamba bathi iBhali Pherazimu. ₁₂AmaFilisti abashiya lapho onkulunkulu bawo, uDavide wathi mababashise ngomlilo.

₁₃AmaFilisti abuye asigasela isigodi. ₁₄UDavide wabuye wabuza kuNkulunkulu, uNkulunkulu wathi kuye: “Ungenyuki uwalandele, kunalokho aqhamukele maqondana namajikijolo. ₁₅Kuyothi lapho sewuzwa umsindo wokuhamba ezihlokweni zamajikijolo, uphume impi, ngokuba uNkulunkulu uphumile ngaphambi kwakho ukubhubhisa amabutho amaFilisti.”

₁₆UDavide wenza njengokuba uNkulunkulu ayemyalile, bawabhubhisa amabutho amaFilisti, kusukela eGibheyoni kuze kube seGezeri.

₁₇Igama likaDavide laphumela emazweni wonke; uSimakade wehlisela izizwe zonke ingebhe ngaye.