1 AMakhosi 1

₁Inkosi uDavide yayisikhulile, neminyaka yayo isiminingi impela. Bayembesa ngezingubo, kepha kwanhlanga zimuka nomoya; ayifudumalanga. ₂Izinceku zathi kuyo: “Inkosi yami, inkosi, ayifunelwe intombi esencane inakekele inkosi, iyibheke, ilale esifubeni sayo, ukuze inkosi yami, inkosi, ifudumale.”

₃Zase zifuna intombi enhle kuyo yonke indawo kwa-Israyeli, zathola u-Abhishagi waseShunemi, zamletha enkosini. ₄Intombi yayiyinhle kakhulu, yayinakekela inkosi; yayisebenzela, kodwa inkosi ayilalanga nayo.

₅U-Adoniya, indodana kaHagithi, wayeziphakamisa, ethi: “Yimi engizokuba yinkosi.”

U-Adoniya wazilungiselela inqola yempi nabamahhashi, nabantu abangama-50 ukuba bagijime phambi kwakhe. ₆Uyise wayengakaze amkhuze nakanye, athi: “Ukwenzeleni lokhu na?”

U-Adoniya wayemuhle kakhulu, elama u-Absalomu.

₇Abantu ababemlandela, bemsiza futhi ecebisana nabo u-Adoniya, kwakunguJowabe, indodana kaZeruya no-Abhiyathara, umphristi. ₈Kepha uZadoki umphristi, uBhenaya indodana kaJehoyada, uNathani umphrofethi, uShimeyi, uReyi namaqhawe kaDavide abamlandelanga u-Adoniya.

₉U-Adoniya wahlaba izimvu, izinkabi namathole akhuluphalisiweyo ngasetsheni eZohelethi, eceleni kwe-Eni Rogeli. Wamema bonke abafowabo, amadodana enkosi, abantu bonke bakwaJuda, izinceku zenkosi, ₁₀kodwa uNathani, umphrofethi, uBhenaya, amaqhawe, noSolomoni, umfowabo, akazange abameme.

₁₁UNathani wathi kuBhathi Sheba, unina kaSolomoni: “Awuzwanga yini ukuthi u-Adoniya, indodana kaHagithi, useyinkosi, inkosi uDavide ingakwazi lokho na? ₁₂Ngakho-ke woza ngikweluleke ukuze usindise impilo yakho neyendodana yakho, uSolomoni. ₁₃Hamba uye enkosini uDavide, uthi kuyo: ‘Wena nkosi yami, awuzange yini ufunge encekukazini yakho, uthi: “USolomoni, indodana yakho, uyokuba yinkosi emva kwami, ahlale esihlalweni sami sobukhosi,” na? Pho kungani u-Adoniya eseyinkosi na?’ ₁₄Kuyothi usakhuluma nenkosi nami ngifike emva kwakho, ngiwafakazele amazwi akho.”

₁₅UBhathi Sheba waya enkosini, wangena ekamelweni eyayikulo; inkosi yayisikhule kakhulu. U-Abhishagi waseShunemi wayeyinakekela inkosi. ₁₆UBhathi Sheba wakhothama, wakhuleka enkosini. Inkosi yathi kuye: “Ungibabele ngani na?”

₁₇Wathi kuyo: “Nkosi yami, wafunga uSimakade uNkulunkulu wakho encekukazini yakho, wathi: ‘USolomoni, indodana yakho, uyakuba yinkosi emva kwami, ahlale esihlalweni sami sobukhosi.’ ₁₈Bheka, manje, u-Adoniya useyinkosi, wena nkosi yami, nkosi, ungakwazi lokho. ₁₉Uhlabe izinkabi, amathole akhuluphalisiweyo, nezimvu okuningi, wamema wonke amadodana enkosi, u-Abhiyathara umphristi, uJowabe umkhuzi wempi, kodwa uSolomoni, inceku yakho, akazange ammeme. ₂₀Amehlo abo bonke abakwa-Israyeli abheke wena, nkosi yami, nkosi, ukuze batshelwe nguwe ukuthi ngubani ozohlala esihlalweni sobukhosi senkosi yami, emva kwayo. ₂₁Funa kuthi lapho inkosi yami, inkosi, isilele koyisemkhulu, mina nendodana yami, uSolomoni, kuthiwe sinecala.”

₂₂Kuthe esakhuluma nenkosi, kwafika uNathani, umphrofethi. ₂₃Bayibikela inkosi, bathi: “Bheka, sekufike umphrofethi, uNathani.”

Wangena enkosini, wayesekhothama wathi mbo ngobuso phambi kwayo.

₂₄UNathani wathi: “Nkosi yami, nkosi, ushilo yini ukuthi: ‘U-Adoniya uzokuba yinkosi emuva kwami, ahlale esihlalweni sami sobukhosi’ na? ₂₅Phela wehlile namuhla ukuba ahlabe izinkabi, amathole akhuluphalisiweyo, nezimvu eziningi; umeme onke amadodana enkosi, abakhuzi bempi, no-Abhiyathara umphristi; bheka, bayadla, bayaphuza phambi kwakhe, bathi: ‘Mana njalo, nkosi Adoniya.’

₂₆“Kepha mina, mina nceku yakho, uZadoki umphristi, uBhenaya, indodana kaJehoyada kanye noSolomoni, inceku yakho, akasimemenga. ₂₇Ngabe le nto yenziwe yinkosi yami, inkosi, ayazazisa izinceku zayo ukuthi ngubani ozohlala esihlalweni sobukhosi senkosi yami, inkosi, emva kwayo na?”

₂₈Inkosi uDavide yayisiphendula, ithi: “Ngibizele uBhathi Sheba.”

UBhathi Sheba weza enkosini, wema phambi kwayo.

₂₉Inkosi yafunga yathi: “Ngifunga ngiyagomela phambi kukaSimakade ohlenge umphefumulo wami kukho konke ukuhlupheka kwami, ₃₀njengoba ngafunga kuwe ngoSimakade uNkulunkulu ka-Israyeli, ngathi uSolomoni, indodana yakho, uyokuba yinkosi emva kwami; uyakuhlala esihlalweni sami sobukhosi esikhundleni sami, ngenza kanjalo namuhla.”

₃₁UBhathi Sheba wayesekhothama wathi mbo ngobuso bakhe phansi, wakhuleka enkosini, wathi: “Mana njalo, nkosi yami, nkosi Davide.”

₃₂Inkosi uDavide yayisithi: “Ngibizele uZadoki umphristi, uNathani umphrofethi, noBhenaya, indodana kaJehoyada.”

Base beza phambi kwenkosi.

₃₃Inkosi yathi kubo: “Thathani izinceku zenkosi yenu nigibelise uSolomoni, indodana yami, umnyuzi wami, nimehlisele eGihoni. ₃₄UZadoki, umphristi noNathani, umphrofethi bayakumgcoba lapho uSolomoni ukuba abe yinkosi kwa-Israyeli, bese nibetha amacilongo, nithi: ‘Mana njalo, nkosi Solomoni.’

₃₅“Bese nimlandela, nenyuke emva kwakhe aze afike ahlale esihlalweni sami sobukhosi, ngokuba nguye engimkhombe ukuba abe yinkosi phezu kuka-Israyeli noJuda.”

₃₆UBhenaya, indodana kaJehoyada, wayiphendula inkosi, wathi: “Makube njalo; uSimakade uNkulunkulu wenkosi yami, inkosi, makasho njalo naye. ₃₇Njengalokhu uSimakade ubenayo inkosi yami, inkosi, sengathi angaba naye uSolomoni, asenze isihlalo sakhe sobukhosi sibe sikhulu kunesihlalo sobukhosi senkosi yami, inkosi uDavide.”

₃₈UZadoki umphristi, uNathani umphrofethi, uBhenaya, indodana kaJehoyada, amaKherethi namaPhelethi behla, bamgibelisa uSolomoni emnyuzini wenkosi uDavide, bamyisa eGihoni. ₃₉UZadoki, umphristi, wathatha uphondo lwamafutha ethendeni, wamgcoba uSolomoni. Babetha amacilongo, bonke abantu bathi: “Mana njalo, nkosi Solomoni.”

₄₀Bonke abantu benyuka belandela uSolomoni bebetha amacilongo. Bathokoza ngokuthokoza okukhulu, kwaze kwangathi kuqhekezeka umhlaba ngenxa yomsindo wabo.

₄₁U-Adoniya nabo bonke ayebamemile bawuzwa umsindo lapho nje beqeda ukudla. UJowabe ezwa ukukhala kwecilongo, wathi: “Ungowani lo msindo wokuxokozela emzini na?”

₄₂Esakhuluma nje, nakho-ke sekufika uJonathani, indodana ka-Abhiyathara, umphristi. U-Adoniya wathi: “Ngena ngokuba wena uyindoda elungile, uphethe izindaba ezinhle.”

₄₃UJonathani waphendula wathi ku-Adoniya: “Qha, nkosi yethu, inkosi uDavide imbekile uSolomoni inkosi. ₄₄Inkosi ithumele noZadoki umphristi, uNathani umphrofethi, uBhenaya, indodana kaJehoyada, amaKherethi namaPhelethi, bamgibelisa emnyuzini wenkosi. ₄₅UZadoki, umphristi noNathani, umphrofethi bamgcobile eGihoni ukuba abe yinkosi. Manje sebenyukele khona bejabula, lo msindo omkhulu emzini yiwo eniwuzwileyo. ₄₆Kumanje nje, uSolomoni usehleli esihlalweni sobukhosi sombuso. ₄₇Nezinceku zenkosi zifikile ukuzoyihalalisela inkosi yethu, inkosi uDavide, zithi: ‘UNkulunkulu wakho makalenze libe lihle igama likaSolomoni ukwedlula elakho. Isihlalo sakhe sobukhosi sibe sikhulu kunesihlalo sakho sobukhosi; inkosi yakhothamisa ikhanda embhedeni wayo.’

₄₈“Yayisithi: ‘Makadunyiswe uSimakade uNkulunkulu ka-Israyeli ommisile namuhla ozohlala esihlalweni sami sobukhosi, ngisabona ngamehlo ami.’ ”

₄₉Bonke abebekade bemenywe ngu-Adoniya besaba, basuka bonke bahamba, kwaba yilowo nalowo wabamba abeze ngayo. ₅₀U-Adoniya, ngenxa yokwesaba uSolomoni, wasuka, wahamba, wayobamba izimpondo ze-althare. ₅₁Kwase kubikwa kuSolomoni kuthiwa: “Bheka, u-Adoniya uyayesaba inkosi uSolomoni, ngalokho usebambe izimpondo ze-althare, ethi: ‘Inkosi uSolomoni mayifunge namuhla ukuthi ayiyukuyibulala inceku yayo ngenkemba.’ ”

₅₂USolomoni wathi: “Uma ezokuba yindoda elungileyo, akukho nolulodwa unwele lwakhe oluyowela emhlabathini, kodwa uma kutholakala kuye okubi, uyokufa.”

₅₃Inkosi uSolomoni yayisithumela ukuba bamehlise e-althare. Wafika wakhuleka enkosini uSolomoni. USolomoni wathi kuye: “Hamba uye endlini yakho.”