Umfelokazi Namafutha
1Owesifazane othile owayegane omunye wamadodana abaphrofethi, waya ku-Elisha wakhala, wathi: “Inceku yakho, indoda yami, ifile, uyazi ukuthi inceku yakho yayimesaba uSimakade. Kufike umtshelekisi, ufuna ukuzithathela abafana bami ababili ukuze babe yizigqila.”
2U-Elisha wathi kuye: “Pho ngikwenzeleni mina? Ngitshele, unani endlini?”
Wathi: “Incekukazi yakho ayinalutho endlini ngaphandle komfuma wamafutha.”
3Wayesethi: “Hamba uyotsheleka izitsha ezingenalutho kubo bonke omakhelwane bakho, zibe ziningi. 4Ngena, uzivalele wena namadodana akho, uthele kuzo zonke lezo zitsha, uzibeke eceleni esezigcwele.”
5Wasuka kuye, wazivalela yena namadodana akhe; wona aletha kuye, yena wathela. 6Kwathi lapho izitsha sezigcwele, wathi endodaneni yakhe: “Sondeza kimi nesinye isitsha.”
Kepha yathi kuye: “Akusekho sitsha.”
Amafutha anqamuka-ke.
7Weza, wabikela umuntu kaNkulunkulu. Yena wathi: “Hamba uthengise ngamafutha, ukhokhe isikweletu sakho, wena namadodana akho niphile ngaseleyo.”
8Kwathi ngelinye ilanga u-Elisha wadlula eya eShunemi lapho kwakukhona owesifazane ocebileyo. Owesifazane wamncenga ukuba adle isinkwa. Kwakuthi njalo uma edlula aphambukele khona ukuba adle. 9Wathi endodeni yakhe: “Uyabona-ke, manje sengiyazi ukuthi ungumuntu ongcwele kaNkulunkulu, lo odlula lapha kithi njalo. 10Ake sixhume odongeni ikamelo eliphezulu, sibeke khona umbhede, itafula, isihlalo, nothi lwesibani; kuyakuthi lapho efika kithi, aphambukele khona.”
11Kwathi ngelinye ilanga wafika lapho, waphambukela ekamelweni eliphezulu, walala khona. 12Wathi kuGehazi, inceku yakhe: “Biza lo mShunemikazi,” wambiza, wema phambi kwakhe. 13Wathi kuye: “Ake usho kuye uthi: ‘Bheka, usinakekele ngakho konke lokhu kunakekela; yini ongenzelwa yona na? Uthanda ukukhulunyelwa enkosini noma kumkhuzi wempi na?’ ”
Wathi: “Ngihlezi phakathi kwabantu bakithi.”
14Wayesethi: “Yini angenzelwa yona?”
UGehazi wathi: “Impela akanandodana, nendoda yakhe isindala.”
15Wayesethi: “Mbize.”
Wambiza; wema ngasemnyango.
16Wathi: “Ngalesi sikhathi ngonyaka ozayo, uyakugona indodana.”
Wathi: “Hhayi, nkosi yami, muntu kaNkulunkulu, ungaqambi amanga encekukazini yakho.”
17Kepha owesifazane wakhulelwa, wazala indodana ngaleso sikhathi ngonyaka olandelayo njengoba u-Elisha ayeshilo kuye.
18Kwathi umfana esekhulile, waphuma ngelinye ilanga, waya kuyise kubavuni. 19Wathi kuyise: “Ngafa yikhanda! Ngafa yikhanda!”
Wayesethi encekwini yakhe: “Myise kunina.”
20Yamthatha, yamyisa kunina; wahlala emathangeni akhe kwaze kwaba semini, wafa. 21Wakhuphuka, wambeka embhedeni womuntu kaNkulunkulu, wamvalela, wayesephuma.
22Wabiza indoda yakhe, wathi: “Ake ungithumele enye yezinceku nenye yezimbongolo ukuba ngiphuthume kumuntu kaNkulunkulu, bese ngibuya.”
23Kepha wathi: “Uyelani kuye namuhla na? Akusilo usuku lokwethwasa kwenyanga, akusilo isabatha.”
Wathi: “Cha, kulungile.”
24Wayesebophela imbongolo, wathi encekwini yakhe: “Yihole, uhambe njalo, ungami uma ngingakasho.”
25Wayesehamba-ke, wafika kumuntu kaNkulunkulu entabeni iKharmeli. Kwathi lapho umuntu kaNkulunkulu embona phambi kwakhe, wathi kuGehazi, inceku yakhe: “Bheka, nanguya umShunemikazi; 26ake ugijime, umhlangabeze, uthi kuye: ‘Usahleli kahle yini na? Indoda yakho isahleli kahle? Umntanakho usahleli kahle?’ ”
Wathi: “Sisahleli kahle.”
27Wafika kumuntu kaNkulunkulu entabeni, wabamba izinyawo zakhe. UGehazi wasondela ukuba amxoshe, kodwa umuntu kaNkulunkulu wathi: “Myeke, ngokuba inhliziyo yakhe inomunyu; uSimakade ungifihlele lokho, akangitshelanga.”
28Wayesethi: “Ngake ngacela yini indodana enkosini yami na? Angishongo yini ukuthi: ‘Ungangikhohlisi,’ na?”
29Wathi kuGehazi: “Bopha ukhalo lwakho, uthathe udondolo lwami ngesandla sakho, uhambe; uma uhlangana nomuntu, ungambingeleli; uma umuntu ekubingelela, ungamphenduli, uyobeka udondolo lwami ebusweni bomntwana.”
30Unina womntwana wathi: “Ngifunga ngiyagomela phambi kukaSimakade naphambi kwakho, angiyukukushiya.”
Wayesesuka wamlandela.
31UGehazi wabendulela, wabeka udondolo ebusweni bomntwana; akubanga bikho lizwi nakuphila. Ngalokho-ke wabuya wayomhlangabeza, wambikela wathi: “Umntwana akavukanga.”
32U-Elisha esefikile endlini, bheka, umntwana wayefile elaliswe embhedeni wakhe. 33Wangena, wabavalela bobabili isicabha, wakhuleka kuSimakade. 34Wakhuphuka, walala phezu komntwana, wabeka umlomo wakhe phezu komlomo wakhe, namehlo akhe phezu kwamehlo akhe, nezandla zakhe phezu kwezandla zakhe; lapho esekhothama phezu kwakhe, inyama yomntwana yaqala ukufudumala. 35Wayesebuya, wahamba ehla enyuka khona endlini; wakhuphuka, wakhothama phezu kwakhe; umntwana wathimula kwaze kwaba kasikhombisa; wayesevula amehlo akhe.
36Wabiza uGehazi, wathi: “Mbize lo mShunemikazi.”
Wambiza. Kuthe esefikile kuye, wathi: “Thatha indodana yakho.”
37Weza kuye, wawa ngasezinyaweni zakhe, wakhothama phansi; wayithatha indodana yakhe, waphuma.
U-Elisha Uqeda Ukufa Okusebhodweni
38U-Elisha wabuyela eGiligali; kwakukhona indlala kulelo lizwe. Amadodana abaphrofethi ayehleli phambi kwakhe. Wathi encekwini yakhe: “Bheka ibhodwe elikhulu, uphekele amadodana abaphrofethi ukudla.”
39Kwaphuma omunye waya endle eyokukha imifino, wathola intandela yasendle, wabutha kuyo izintangazane, wazigcwalisa ingubo yakhe; wafika, waziklabelela ebhodweni lokudla, ngokuba babengazazi. 40Base bephakela abantu ukuze badle. Kwathi besakudla lokho kudla, bakhala bathi: “We muntu kaNkulunkulu, kukhona ukufa ebhodweni.”
Babengasenakukudla.
41Kepha wathi: “Lethani impuphu.”
Wayithela ebhodweni, wathi: “Phakela abantu ukuba badle.”
Kwakungasekho okubi ebhodweni.
U-Elisha Usuthisa Abantu Abayikhulu
42Kwafika umuntu waseBhali Shalisha elethele umuntu kaNkulunkulu ukudla kolibo lokuqala, izinkwa zebhali ezingama-20 nezikhwebu ezintsha zamabele emgodleni wakhe. Wathi: “Banike abantu ukuba badle.”
43Kepha isikhonzi sakhe sathi: “Uthini? Ngibeke lokhu phambi kwabantu abayikhulu na?”
Wathi: “Banike abantu ukuba badle, ngokuba usho kanje uSimakade, uthi: ‘Bayakudla, kusale.’ ”
44Sase sikubeka phambi kwabo; badla, kwasala njengokusho kukaSimakade.
