UBharukhi 6

₁Ikhophi yencwadi kaJeremiya ayithumela kulabo ababethunjelwe eBhabhiloni yinkosi yaseBhabhiloni, ukudlulisa umyalezo uNkulunkulu ayemyalele wona. ₁Ngenxa yezono enizenzileyo phambi kukaSimoni Nkulunkulu, niyakuthunjelwa eBhabhiloni njengezigqila nguNebukhadinezari, inkosi yaseBhabhiloni. ₂Ngakho-ke nxa senifikile eBhabhiloni niyakuhlala lapho iminyaka ngeminyaka, kuze kube yisizukulwane sesikhombisa, emva kwalokho ngiyakunibuyisa lapho ngokuthula. ₃Ngakho-ke eBhabhiloni niyakubona onkulunkulu abenziwe ngesiliva nangegolide nangokhuni, abantu ababathwala emahlombe abo, futhi abenza abangakholwa bagcwale ukwesaba.

₄Ngakho-ke xwayani ningaze nafana nabezizwe noma nivumele uvalo lwabo ngalabo nkulunkulu lubambe nina ₅lapho nibona izixuku phambi nangemuva kwabo zibakhulekela. Nina anothi ezinhliziyweni zenu, “Nguwe wedwa, Nkosi esifanele ukumkhonza.”

₆Ngokuba ingelosi yami inani futhi iyiqaphile imiphefumulo yenu. ₇Ulimi lwabo lulolongiwe ngumbazi, futhi nabo bembathisiwe ngegolide nesiliva; kodwa nokho bayize futhi kabakwazi nokukhuluma ₈njengokuba abantu benokwenzela intombazane ubucwebe bokuhloba kanjalo bathatha igolide benze imiqhele yamakhanda onkulunkulu babo. ₉Ngesinye isikhathi abaphristi bathatha igolide nesiliva ngasese konkulunkulu babo balisebenzisele imisebenzi yabo ₁₀noma badize ngelinye lalo ezifebeni zasethempelini. Bembathisa onkulunkulu babo ngemvunulo njengoba benza kubantu; labo nkulunkulu besiliva negolide nokhuni ₁₁kabakwazi ukuzisindisa bona ekugqwaleni nasenundwini. Lapho sebegqokisiwe ezibubende ₁₂ubuso babo buyesulwa ngenxa yezintuli zasethempelini, ezilugqinsi phezu kwabo. ₁₃Omunye wabo uphethe intonga, njengomahluleli wesifunda, kodwa kanamandla okubhubhisa noma ngubani omedelelayo. Omunye uphethe isizenze esandleni sakhe sokunene, kanye nezembe, kodwa kakwazi ukuzivikela empini nakubaphangi.

₁₄Uma sibheka lokhu, kusobala ukuthi kabasibo onkulunkulu; ngakho-ke ningabesabi. ₁₅Ngokuba njengokuba isitsha somuntu singenamsebenzi nxa sephukile banjalo nonkulunkulu babo lapho sebebekwe emathempelini. ₁₆Amehlo abo agcwele uthuli, oluthunquzwe yilabo abangena ethempelini. ₁₇Futhi njengokuba amasango evalwa nxazonke kunoma ngubani owedelele inkosi, ngokungathi ugwetshwe intambo, ngakho-ke abaphristi benza amathempeli abo aqine ngeminyango, nangonobhadula bezinsimbi, ukuze izinswelaboya zingebi kuwo. ₁₈Babakhanyisela izibani ngobuningi bazo, nakuba onkulunkulu babo bengaboni kunokuba bazikhanyisele bona uqobo. ₁₉Bafana nensika yasethempelini, kodwa abantu bathi inhliziyo yabo idliwa iqedwe izinambuzane zasemhlabeni, zidla izingubo zabo kodwa abakuboni ukuthi kusho ukuthini lokho. ₂₀Ubuso babo bufuswe yintuthu yasethempelini. ₂₁Amalulwane, nezinkonjane, nezinyoni zikhwela phezu kwemizimba yabo nasemakhanda abo, kanjalo namakati.

₂₂Uma ubheka konke lokhu kusobala ukuthi kabasibo onkulunkulu; ngakho-ke ningabesabi. ₂₃Angisaphathi negolide abagqokiswa lona ukuze babe bahle – alinakucwebezela ngaphandle kokuba kukhona olesula uthuli, kanjalo nalapho zisabazwa, zazingezwa lutho. ₂₄Abantu bazithenga ngaphandle kokuba banake ukuthi zibiza kangakanani, futhi akukho mphefumulo kuzo. ₂₅Ngenxa yokuba zingenamilenze, zithwalwa emahlombe ngabanye, okukhombisa isintu ukungasho lutho kwazo. Futhi labo abazikhonzayo bathelwa ngehlazo ₂₆ngenxa yokuba uma omunye walaba onkulunkulu ewela phansi, kudinga bona uqobo ukuba bamphakamise, uma omunye emmisa amqondise, akakwazi ukuzinyakazisa, futhi uma etshekile akakwazi ukuziqondisa. Kubekwa izipho phambi kwabo njengoba kwenziwa kwabafileyo.

₂₇Abaphristi bayayidayisa imihlatshelo enikelwe kulabo nkulunkulu basebenzise imali abayitholile kwezabo izidingo. Ngokunjalo nomkabo bagquma enye inyama ngosawoti, kodwa kungabikho lutho abalunika abampofu nabangakwazi ukuzisiza. ₂₈Imihlatshelo eyenzelwa labo nkulunkulu inokuthintwa ngisho nangabesifazane besesikhathini noma besanda kubeletha. Ngalezi zinto uyobona ukuthi azisibo onkulunkulu, ungazesabi. ₂₉Ngokuba kukanjani ukuba babizwe ngonkulunkulu na? Abesifazane babenzela ukudla labo nkulunkulu besiliva negolide kanye nokhuni ₃₀futhi emathempelini abo abaphristi bahlala begqoke izingubo ezidabukile, amakhanda nezintshebe zabo kugundiwe, futhi engamboziwe amakhanda abo.

₃₁Bayaklewula bamemeze phambi konkulunkulu babo njengoba abanye benza emadilini emingcwabo. ₃₂Abaphristi bathatha ezinye zezimpahla zalabo nkulunkulu ukuba bagqokise abafazi babo nezingane zabo. ₃₃Noma ngabe umuntu enza okuhle noma okubi kubo abakwazi ukuphindisela. Abakwazi ukumisa inkosi noma bayehlise esihlalweni. ₃₄Ngokunjalo abakwazi nokunika ingcebo noma imali; uma umuntu enza isifungo kubo angasifezi, abakwazi ukusifuna kuye. ₃₅Abakwazi kusindisa muntu ekufeni noma bophule obuthakathaka konamandla, ₃₆abakwazi ukwenza izimpumputhe zibone; abakwazi ukophula abasosizini. ₃₇Abakwazi ukuba nozwelo kumfelokazi noma benze okuhle entandaneni. ₃₈Labo nkulunkulu abenziwe ngokhuni bacakwa ngegolide nesiliva bafana namatshe asentabeni, labo ababakhonzayo bayakuthelwa ngehlazo.

₃₉Kungani pho ukuba kube khona abacabanga ukuthi bango nkulunkulu noma abababiza ngonkulunkulu na? Nangaphezu kwalokho, ngisho amaKhaledi imbala awabahloniphi; ngokuba nokuba bebona okuthile kabakhulumi, baletha uBeli bakhuleke ukuba ongakhulumi akhulume, ngokungathi uBeli unakho ukuqonda. ₄₀Nabo ngokunjalo abakuboni lokhu ukuze babashiye, ngokuba abanangqondo. ₄₁Nabesifazane bezigige ngezintambo, bahlala begudle umhubhe, beshisa ubhurandi njengempepho. ₄₂Lapho omunye wabo eholwa ngomunye wabedlulayo ukuba ayolala naye, ubukela phansi abehlezi eduze kwakhe, ngokuba ebengemuhle njengaye futhi nentambo yakhe ingagqashulwanga.

₄₃Konke okwenzelwa lezi zithombe kuyinkohliso. Kungani pho ukuba kube khona abacabanga ukuthi bango nkulunkulu noma abazibiza ngokuthi ngonkulunkulu na? ₄₄Zenziwe ngababazi nabacangcathi; azikwazi ukuba lutho ngaphandle kwalokho okufiswe ngumbazi.

₄₅Labo abazenzile abakwazi bona uqobo ukuphila isikhathi eside, ₄₆kwenzeka kanjani pho ukuba izinto ezenziwe yibo kuthiwe zingo nkulunkulu na? Bashiye inkohliso nesinengiso beshiyela abeza emva kwabo. ₄₇Ngokuba lapho kuqubuka impi noma behlelwa sigemegeme esikhulu, abaphristi bahlanganisa amakhanda bebuzana ukuba bangayogwaca kuphi bona nonkulunkulu babo. ₄₈Kwenzeka kanjani pho ukuba umuntu ehluleke ukubona ukuthi lezi zinto akubona onkulunkulu na? Ngokuba abakwazi nokuzisindisa bona uqobo empini nasenhlekeleleni, ₄₉ngenxa yokuba benziwe ngokhuni futhi bacakwa ngegolide nesiliva, kuyakuvela obala emva kwesikhathi ukuthi bayinkohliso. ₅₀Kuyakuba sobala kuzo zonke izizwe namakhosi ukuthi kababona onkulunkulu, kodwa imisebenzi yezandla zabantu, nokuthi akukho kubo okungumsebenzi kaNkulunkulu.

₅₁Ngubani pho ongehluleka ukubona ukuthi kababona onkulunkulu na? ₅₂Ngokuba kabakwazi ukubeka inkosi noma banike imvula kubantu.

₅₃Abakwazi nokwahlulela eyabo indlela noma bophule lowo okwenziwe okungalungile kuye, ngokuba bengenamandla. ₅₄Bafana namagwababa phakathi kwezulu nomhlaba. Lapho kuqubuka umlilo ethempelini lalabo nkulunkulu bokhuni abacakwe ngegolide noma ngesiliva, abaphristi babo bayabaleka ukuze baphephe kepha kuthi labo nkulunkulu bashe njengezingodo ezisetshenziswe ekwakheni ithempeli.

₅₅Nangaphandle kwalokho, kabakwazi ukubhekana nankosi ehlaselayo noma isitha. Kungani pho ukuba abantu bavume noma bacabange ukuthi bango nkulunkulu na? ₅₆Onkulunkulu abenziwe ngemithi bacakwa ngesiliva negolide kabanamandla okuzisindisa emaseleni noma kubaphangi. ₅₇Noma ngubani onamandla okuxebula igolide nesiliva kanye nezingubo abazigqokileyo, ahambe nayo yonke impango, abakwazi ukuzisiza bona uqobo.

₅₈Kungcono ukuba yinkosi ekhombisa isibindi, noma isitsha sasendlini esisiza umniniso ezidingweni zakhe, kunokuba yilabo nkulunkulu benkohliso; ungcono ngisho umnyango wendlu okwazi ukuvikela impahla engaphakathi, kunalabo nkulunkulu abayinkohliso; ingcono ngisho insika yomuthi esesigodlweni senkosi, kunalabonkulunkulu. ₅₉Ngokuba ilanga nenyanga nezinkanyezi kuyakhanya, futhi lapho kuthunyiwe ukuyokwenza umsebenzi kuyalalela.

₆₀Kanjalo nonyazi, lapho luphazima, lubonwa ezindaweni eziningi; nomoya ngokunjalo uphephetha emazweni amaningi. ₆₁Lapho uNkulunkulu eyala amafu ukuba ahambe phezu komhlaba wonke, enza njengoba eyaliwe, ₆₂nomlilo othunyiwe uvela kweliphezulu ukuba udle izintaba namahlathi, wenza njengokuba uyaliwe. Kodwa lezi zithombe azinakuqhathaniswa nakho konke lokhu ngokubukeka nangokwamandla. ₆₃Ngakho-ke umuntu akangacabangi ukuthi onkulunkulu laba, noma ababize ngonkulunkulu, ngokuba abakwazi ukwahlulela icala kumbe ukwenzela noma ngubani okuhle. ₆₄Ngenxa yokuba uyazi ukuthi abasibo onkulunkulu, ungabesabi, ₆₅abakwazi kuqalekisa nakubusisa amakhosi, ₆₆abakwazi nakuvezela izizwe izibonakaliso ezulwini, noma bakhanyise okwelanga kumbe banikeze ukukhanya njengenyanga.

₆₇Izilwane zasendle zingcono kunabo, ngokuba ziyakwazi ukubaleka zicashe, ngaleyo ndlela zizisize. ₆₈Ngakho-ke asinabufakazi nobunci bokuthi ngonkulunkulu laba, ngakho-ke ningabesabi. ₆₉Njengesichuse embhedeni wamakhukhumba, esingalindi lutho, banjalo nonkulunkulu bokhuni abacakwe ngegolide nesiliva. ₇₀Ngokufanayo nonkulunkulu babo bokhuni, abacakwe ngegolide nesiliva, bafana nesihlahla sameva ensimini okuhlala kuso zonke izinyoni ezomile; noma bafana nesidumbu esijikijelwe ngaphandle ebumnyameni. ₇₁Nxa ubona okububende kanye nelineni libolela kubo lokho kuyokwenza wazi ukuthi kabasibo onkulunkulu; futhi isigcino sabo ngukubhujiswa, babe yisicunulo ezweni. ₇₂Ngakho-ke, ungcono umuntu oqotho ongakhonzi izithombe, lowo muntu kasoze agxekwa muntu.