UHezekeli 44

₁Wayesengibuyisa ngendlela yesango lendlu engcwele, elingaphandle, elibheke ngasempumalanga. ₂USimakade wathi kimi: “Leli sango liyakuvalwa, lingavulwa, kungangeni muntu ngalo, ngokuba uSimakade uNkulunkulu ka-Israyeli ungene ngalo, yingakho-ke liyakuhlala livaliwe. ₃Kepha isikhulu yisikhulu, sona siyakuhlala kulo, sidle phambi kukaSimakade, singene ngendlela yompheme wesango, futhi siphume ngendlela yawo.”

₄Wayesengiyisa phambi kwendlu ngendlela yesango esenyakatho. Ngabuka; bheka, inkazimulo kaSimakade yagcwalisa indlu yakhe; ngase ngiwa ngithi mbo ngobuso.

₅USimakade wathi kimi: “Ndodana yomuntu, qaphelisisa, uzibonele ngawakho amehlo, uzizwele ngezakho izindlebe konke engikukhuluma kuwe maqondana nazo zonke izimiso zendlu kaSimakade, nangayo yonke imithetho yayo; uyiqaphelisise indawo yokungena yendlu, nazo zonke izindawo zokuphuma zendlu engcwele. ₆Uyakusho endlini ehlubukayo yakwa-Israyeli, uthi: ‘Isho kanje iNkosi uSimakade, ithi: “Maye, nina ndlu yakwa-Israyeli, sezanele izinengiso zenu! ₇Ngokuba ningenise abezizwe abangasokile enhliziyweni nasenyameni, ukuba bangene endlini yami engcwele, bayingcolisa indlu yami; lapho ninikela kimi ngesinkwa, ngamanoni nangegazi; nasephula isivumelwano sami ngazo zonke izinengiso zenu. ₈Aniyigcinanga inkonzo yezinto zami ezingcwele, kodwa nizibekele abayakunigcinela inkonzo endlini yami engcwele.”

₉Isho kanje iNkosi uSimakade, ithi: ‘Endlini yami engcwele akayukungena owezizwe ongasokile enhliziyweni nongasokile enyameni, kubo bonke abezizwe abahlala nabantu bakwa-Israyeli.

₁₀“ ‘ “Kepha abaLevi baqhelela kude nami ngesikhathi u-Israyeli eduka, ephambuka, elandela izithombe zabo, nabo bayakubuthwala ububi babo. ₁₁Bayakuba yizikhonzi endlini yami engcwele, babengababonisi emasangweni endlu, bakhonze endlini, bahlabe imihlatshelo yokushiswa nabayihlabela abantu, bame phambi kwabo ukuba basize abantu. ₁₂Ngokuba babebasebenzela phambi kwezithombe zabo, baba yisikhubekiso ngobubi babo kuyo indlu yakwa-Israyeli; ngakho-ke ngiphakamise isandla sami ngamelana nabo, ukuba bakuthwale ukona kwabo,” ’ kusho iNkosi uSimakade.

₁₃“ ‘Abasayukusondela kimi ukuba bangikhonze bengabaphristi, futhi abayukusondela ezintweni zami ezingcwele, izinto ezingcwelengwele, kodwa bayakulithwala ihlazo labo nezinengiso zabo abazenzileyo. ₁₄Nokho, ngiyakubenza babe ngabagcini benkonzo yendlu, kuwo wonke umsebenzini wayo, nakukho konke okuyakwenziwa kuyo.

₁₅“ ‘Kepha abaphristi babaLevi, amadodana kaZadoki, ababegcina inkonzo yendlu yami engcwele ngesikhathi abakwa-Israyeli bephambuka kimi, yibona abayakusondela kimi, bangikhonze, bame phambi kwami, banikele ngamanoni nangegazi, kusho iNkosi uSimakade. ₁₆Bayakungena endlini yami engcwele, basondele etafuleni lami ukuba bangikhonze, futhi bayigcine inkonzo yami.

₁₇“ ‘Kuyothi lapho bengena emasangweni egceke elingaphakathi, bembathiswe izembatho zelineni, bangembathi sembatho esenziwe ngensonto ngesikhathi bekhonza emasangweni egceke elingaphakathi nasendlini. ₁₈Bayakuthwala izigqoko zelineni emakhanda abo, ngaphansi bagqoke izimpahla zelineni, bangakubhinci okhalo lwabo okujulukisayo. ₁₉Kuyothi lapho bephumela egcekeni elingaphandle, okuyigceke labantu, bazikhumule izembatho zabo abakhonza ngazo, bazibeke emakamelweni angcwele, bagqoke ezinye izingubo, funa bangcwelise abantu ngezembatho zabo.

₂₀“ ‘Abayukuphuca emakhanda abo, bangabi nazihluthu, kepha bagunde emakhanda abo. ₂₁Akukho noyedwa kulabo baphristi oyakuphuza iwayini ngesikhathi bengena egcekeni elingaphakathi. ₂₂Abayukumthatha umfelokazi nolahliweyo babe ngabafazi babo, kodwa bayakuthatha izintombi ozalweni lwendlu yakwa-Israyeli, noma umfelokazi obegane umphristi. ₂₃Bayakubafundisa abantu bami ukwehlukanisa okungcwele nokuyichilo, benze umehluko phakathi kokungcolileyo nokuhlanzekileyo.

₂₄“ ‘Kuyakuthi uma kunombango, basukume ukuba behlulele. Bayakwehlulela ngokwezehlulelo zami, bagcine imithetho yami nezimiso zami emikhosini yonke yami, futhi balingcwelise isabatha lami.

₂₅“ ‘Abayukusithinta isidumbu, funa bazigcolise, kodwa bangazingcolisa ngokuthinta esikayise, esikanina, esendodana, esendodakazi, esomfowabo, nesikadadewabo ongenandoda. ₂₆Nxa esehlambulukile, uyakubalelwa izinsuku eziyisikhombisa. ₂₇Ngosuku angena ngalo endlini engcwele, egcekeni elingaphakathi, ukuyokhonza kuyo, uyakunikela ngomnikelo wakhe wesono,’ ” kusho iNkosi uSimakade.

₂₈“ ‘Bayakuba nefa; Mina ngiyifa labo; aniyukubanika imfuyo kwa-Israyeli; Mina ngiyimfuyo yabo. ₂₉Bayakudla umnikelo wokusanhlamvu, umnikelo wesono, nomnikelo wecala, konke lokho okwehlukanisiweyo kwa-Israyeli kuyakuba ngokwabo. ₃₀Lonke ulibo lokuqala lwakho lwekhethelo, konke nayo yonke iminikelo yakho, konke eminikelweni yenu yonke, kuyakuba ngokwabaphristi, nimnike umphristi ulibo lwenhlama yenu, ukuze isibusiso sihlale endlini yakho. ₃₁Abaphristi abayukuyidla inyoni noma isilwane esizifeleyo noma esidweshuliweyo.’ ”