IGenesisi 17

₁Kwathi u-Abhrama eseneminyaka engama-99, uSimakade wabonakala kuye wathi: “NginguNkulunkulu uSomandla. Hamba phambi kwami ungenasici. ₂Ngizosigcina isivumelwano esiphakathi kwami nawe, ngikwandise kakhulu.”

₃U-Abhrama wakhothama wathi mbo ngobuso, uNkulunkulu wathi kuye: ₄“Mina ngiyazibophezela kulesi sivumelwano engisenza nawe: uyakuba nguyise wezizwe eziningi. ₅Igama lakho alisayukuba ngu-Abhrama, kepha selizokuba ngu-Abhrahama, ngokuba ngikwenze uyise wezizwe eziningi. ₆Ngizokwandisa kakhulu, kuvele kuwe izizwe eziningi ngisho namakhosi imbala. ₇Ngiyakumisa isivumelwano esiphakade phakathi kwami nawe, nezizukulwane zakho, ngibe nguNkulunkulu wakho nowazo. ₈Ngikunika lonke iKhanani ongumfokazi kulo njengamanje, libe yifa lakho laphakade nelezizukulwane zakho, ngibe nguNkulunkulu wazo.”

₉Wayesethi uNkulunkulu ku-Abhrahama: “Gcina isivumelwano sami, wena nezizukulwane zakho. ₁₀Yilesi isivumelwano sami nawe nezizukulwane zakho, okufanele nisigcine: wonke umuntu wesilisa phakathi kwenu kufanele asokwe, ₁₁ukuze lokhu kube wuphawu lwesivumelwano phakathi kwami nani. ₁₂Ezizukulwaneni zonke umntwana ongumfana phakathi kwenu, osenezinsuku eziyisishiyagalombili ezelwe, kufanele asokwe, ngisho nalabo abazalelwe kwakho abangazalwa nguwe, noma ngabe bathengwe ngemali kowezizwe, ₁₃noma ngabe bazalelwe kwakho, noma bathengwe ngemali; mabasokwe. Lolu phawu alushaywe emizimbeni yenu lube yisivumelwano sami saphakade. ₁₄Bonke abesilisa abangasokile bayonqunywa, bangahlanganyeli nabantu bakubo, ngokuba basephulile isivumelwano sami.”

₁₅UNkulunkulu wabuye wathi ku-Abhrahama: “USarayi umkakho awusezukumbiza ngoSarayi, igama lakhe sekuzokuba nguSara. ₁₆Ngizombusisa akuzalele indodana, abe ngunina wezizwe eziningi okuyovela kuzo amakhosi ayobusa izizwe.”

₁₇U-Abhrahama wakhothama wathi mbo ngobuso wahleka, wakhuluma yedwa wathi: “Indoda ingayizala kanjani ingane isinekhulu leminyaka na? USara angabe esakwazi ukuzala ingane esehlanganise iminyaka engama-90, na?”

₁₈Wathi u-Abhrahama kuNkulunkulu: “Sengathi u-Ishmayeli angaphila phambi kwakho.”

₁₉UNkulunkulu wathi: “Akunjalo; ngumkakho uSara ozokuzalela indodana; uyiqambe igama uthi ngu-Isaka. Ngiyosigcina isivumelwano sami nakuye, sibe yisivumelwano saphakade ngisho nasesizukulwaneni sakhe. ₂₀Mayelana no-Ishmayeli ngisizwile isicelo sakho, naye ngizombusisa ngimuphe inzalo eningi, nezizukulwane eziningi. Uyakuba nguyise wamakhosi ayi-12, ngimenze abe yisizwe esikhulu. ₂₁Kepha isivumelwano sami ngiyosimisa no-Isaka, ozomzalelwa nguSara ngalesi sikhathi, ngonyaka ozayo.”

₂₂UNkulunkulu eseqedile ukukhuluma no-Abhrahama, wenyuka, wamshiya.

₂₃Ngalolo lusuku u-Abhrahama wabiza u-Ishmayeli nazo zonke izinceku ezazizalelwe kwakhe, nazo zonke izigqila ayezithengile, wabasoka, njengalokhu uNkulunkulu ayemyalile. ₂₄U-Abhrahama wayesehlanganise iminyaka engama-99 mhla esokwa. ₂₅U-Ishmayeli wayeseqede iminyaka eyi-13 mhla esokwa. ₂₆Ngalelo langa kwasokwa u-Abhrahama no-Ishmayeli indodana yakhe, ₂₇nabo bonke abendlu yakhe, labo ababezalelwe kwakhe, nezigqila ezazithengwe kwabezizwe.