IGenesisi 34

₁UDina, indodakazi kaLeya ayeyizalele uJakobe, wavakashela ezinye izintombi zendawo. ₂UShekhemu, indodana kaHamori, umHivi, owayebusa kulelo lizwe, wambona wamthatha, wamona, wamthela ngehlazo. ₃Wayethathekile nguDina, indodakazi kaJakobe, futhi emthanda, wakhuluma naye wathulula inhliziyo yakhe kuye. ₄UShekhemu wakhuluma noyise uHamori, wathi: “Ngithathele le ntombi ibe ngumkami.”

₅UJakobe wezwa ngesigameko sokungcoliswa kwendodakazi yakhe uDina, kodwa akaze asho lutho kwaze kwafika amadodana akhe evela ekwaluseni.

₆UHamori, uyise kaShekhemu wahamba waya kuJakobe eyokhonga. ₇Amadodana kaJakobe ayefika nje evela ekwaluseni lapho ezwa ngaleso sigameko, ashaqeka, awotha ubomvu, ngokuba wayenze ichilo kwa-Israyeli ngokungcolisa indodakazi kaJakobe, okwakuyinto eyayingafanele neze ukwenziwa.

₈UHamori wathi kubo: “Indodana yami uShekhemu iyayithanda indodakazi yenu. Mganiseleni yona ibe ngumkakhe. ₉Masiganiselane, nisinike amadodakazi enu abe ngabafazi bethu, nani nithathe amadodakazi ethu abe ngabafazi benu. ₁₀Hlalani phakathi kwethu, nanti izwe phambi kwenu. Yakhani, nithengiselane, nibe nezindawo zenu.”

₁₁UShekhemu wayesethi kuJakobe nakubafowabo bentombazane: “Uma ngifumene umusa kini, shonini enikufunayo, ngizoninika khona. ₁₂Nqumani ilobolo nezibizo zenu, akukhathaleki ukuthi nibiza kangakanani, mina ngizoninika konke enikufunayo, inqobo nje uma nizongiganisela indodakazi yenu ibe ngumkami.”

₁₃Amadodana kaJakobe aphendula uShekhemu noyise uHamori ngobuqili, ngokuba wayengcolise udadewabo uDina. ₁₄Athi kubo: “Asikwazi ukwenza into efana naleyo, yokuthatha udadewethu simendise kumuntu ongasokile, onejwabu. Lokho kuyihlazo kithi. ₁₅Siyakuvuma lokho, inqobo nje uma nizoba njengathi, kusoke bonke abesilisa bakini. ₁₆Siyakuninika amadodakazi ethu, nathi sizithathele amadodakazi enu, sihlale nani, sibe sizwe sinye. ₁₇Kepha-ke uma ningavumelani nokuthi nisokwe, sizothatha udadewethu sihambe naye.”

₁₈Amazwi abo ayithola indawo kuHamori noShekhemu indodana yakhe. ₁₉Le nsizwa ayipholisanga maseko, yasoka, kwazise yayisha amashushu ngoDina, futhi ihlonishwa kakhulu kunabo bonke abendlu kayise.

₂₀UHamori nendodana yakhe baphumela esigcawini somuzi, bakhuluma nezakhamuzi, bathi: ₂₁“Laba bantu bahlezi ngokuthula nathi. Asibavumele bahambe bazithengele izindawo ngokuba izwe libanzi nxazonke, ukuze sikwazi ukuganiselana nabo. ₂₂Bavumile ukuthi bangahlala phakathi kwethu, sibe muntu munye, kuphela nje uma bonke abesilisa phakathi kwethu bezosokwa njengoba nabo besokiwe. ₂₃Uma sibavumela, imihlambi yabo, impahla yabo, nayo yonke imfuyo yabo, akuyukuba ngokwethu na?”

₂₄Zonke izakhamuzi zavumelana noHamori nendodana yakhe uShekhemu, bonke abesilisa ababakhe kuleyo ndawo basokwa.

₂₅Kwathi ngosuku lwesithathu isabhokile iminjunju yokusokwa, amadodana kaJakobe, uSimeyoni noLevi, abafowabo bakaDina, bathatha kwaba yilowo nalowo inkemba, baphuma bayohlasela umuzi iShekhemu isinyelela, bashaya icole kwabesilisa. ₂₆Babulala uHamori noShekhemu indodana yakhe ngenkemba, bakhipha uDina endlini kaShekhemu, bahamba naye. ₂₇Afika namanye amadodana kaJakobe afica izidumbu, ayesewuphanga umuzi, ngokuba wayengcoliselwe lapho udadewabo. ₂₈Bashaqa imihlambi yezimvu, izinkomo, izimbongolo zabo, okwakusemzini nasemadlelweni, ₂₉nayo yonke ingcebo, bathumba izingane, amakhosikazi, bakuphanga konke okwakusezindlini.

₃₀UJakobe wayesethi kuSimeyoni noLevi: “Ningikhathazile, nangidonsela amanzi ngomsele kubantu bezwe, kumaKhanani namaPherizi; nina niyingcosana nje, bayakuhlangana basihlasele, bangichithe mina nendlu yami.”

₃₁Bamphendula bathi: “Bekufanele yini udadewethu aphathiswe okwesifebe na?”