IGenesisi 46

₁U-Israyeli waphuma eKhanani nakho konke ayenakho, kwathi lapho efika eBheri Sheba, wenzela uNkulunkulu kayise u-Isaka umhlatshelo. ₂UNkulunkulu wakhuluma ku-Israyeli ngemibono eminingi ebusuku, wathi: “Jakobe, Jakobe!”

Yena wathi: “Ngilapha.”

₃UNkulunkulu wathi: “NginguNkulunkulu, uNkulunkulu kayihlo; ungesabi ukwehlela eGibhithe, ngizokwenza ube yisizwe esikhulu lapho. ₄Ngizohamba nawe ukuya eGibhithe, futhi ngiyakukukhuphula lapho; yisandla sikaJosefa esiyokucimezisa.”

₅UJakobe wasuka eBheri Sheba, amadodana ka-Israyeli amgibelisa uyise, nabantwana bawo, nomkawo ezinqoleni ezazikhishwe nguFaro ukuba zibathwale. ₆Baqhuba yonke imihlambi yabo, bathatha nempahla yonke ababeyithole eKhanani, uJakobe wakhukhula naso sonke isizukulwane sakhe baze bayofika eGibhithe. ₇Amadodana akhe, namadodana awo, namadodakazi akhe, namadodakazi amadodana akhe, bonke abantwana bakhe nesizukulwane sakhe behla naye baya eGibhithe.

₈Nanka amagama abakwa-Israyeli abahamba baya eGibhithe noJakobe nesizukulwane sakhe: uRubeni, izibulo lakhe, ₉namadodana akhe uHanokhi, uPhalu, uHezironi noKharimi. ₁₀Amadodana kaSimeyoni kwakunguJemuweli, uJamini, u-Ohadi, uJakhini, uZoha noShawule, owayezalwa ngowesifazane ongumKhanani. ₁₁Amadodana kaLevi: nguGereshoni, uKhohathi, noMerari. ₁₂Amadodana kaJuda kungu-Eri, u-Onani, uShela, uPherezi, noZera. Kuwona u-Eri, no-Onani bafela eKhanani. Amadodana kaPherezi: kwakunguHezironi noHamuli. ₁₃Amadodana ka-Isakhari: kunguThola, uPhuva, uJashubi, noShimroni. ₁₄Amadodana kaZabuloni, kwakunguSeredi, u-Eloni, noJaleli. ₁₅Yilawo-ke amagama amadodana uLeya amzalela wona uJakobe ePhadani Aramu, noDina indodakazi yakhe. Esewonke amadodana namadodakazi kaJakobe ayengama-33.

₁₆Amadodana kaGadi: kwakunguZifiyoni, uHagi, uShuni, u-Ezibhoni, u-Eri, u-Arodi, no-Areli. ₁₇Amadodana ka-Asheri: kwakungu-Imna, u-Ishiva, u-Ishivi, uBheriya, noSera udadewabo. Amadodana kaBheriya: kwakunguHebhere noMalikhiyeli. ₁₈Yilawo-ke amagama amadodana ayeyi-16 kaZilipha, awazalela uJakobe. ULabani wayenike uLeya indodakazi yakhe uZilipha ukuba abe yisisebenzi sakhe.

₁₉Amadodana kaRaheli, umkaJakobe: kwakunguJosefa noBhenjamini. ₂₀Kuthe uJosefa eseGibhithe wazala uManase no-Efrayimi ku-Asenathi, indodakazi kaPotifera, umphristi wase-Oni. ₂₁Amadodana kaBhenjamini: kwakunguBhela, uBhekheri, u-Ashibheli, uGera, uNahamani, u-Ehi, uRoshi, uMuphimu, uHuphimu, no-Aridi. ₂₂Lawa kwakungamadodana kaRaheli ayemzalele wona uJakobe; esewonke ayeyi-14.

₂₃Indodana kaDani kwakunguHushimu. ₂₄Amadodana kaNafethali: kwakunguJahiziyeli, uGuni, uJezeri, noShilemu. ₂₅Lawo kwakungamadodana kaBhiliha, uLabani ayemunike yena uRaheli, indodakazi yakhe, esewonke ayeyisikhombisa.

₂₆Bonke abantu abangena eGibhithe noJakobe, abavela okhalo lwakhe ngaphandle kwabafazi babo, babengama-66. ₂₇Amadodana kaJosefa azalelwa eGibhithe aba mabili, ngakho-ke bonke abendlu kaJakobe abaya eGibhithe babengama-70.

₂₈UJakobe wathumela uJuda ukuthi ahambe phambili aye kuJosefa, ukuze abahole ukuya eGosheni. Ekufikeni kwabo eGosheni, ₂₉uJosefa wabophela inqola yakhe yempi, wakhuphuka, wamhlangabeza uyise u-Israyeli. UJosefa waziveza kuye, wamgona, wakhala isikhathi eside encike ehlombe lakhe.

₃₀U-Israyeli wathi kuJosefa: “Sengingafa manje njengoba sengizibonele ngawami ukuthi usawadla anhlamvana.”

₃₁UJosefa wayesethi kubafowabo nakwabendlu kayise: “Ake ngihambe ngiyobikela uFaro ukuthi abafowethu nabendlu kababa abebeseKhanani sebefikile ukuzohlala nami. ₃₂Lawa madoda angabelusi bemfuyo, amadoda anemihlambi, afike nayo yonke imfuyo yawo, nakho konke anakho. ₃₃Kuyothi lapho uFaro enibuza ethi: ‘Uyini umsebenzi wenu na?’ ₃₄Niyothi: ‘Izinceku zakho selokhu kwathi nhlo zingabantu bemfuyo, thina nawobaba,’ ukuze anivumele nihlale eGosheni, ngokuba kwabaseGibhithe abelusi bayanengeka.”