IGenesisi 49

₂“Hlanganani, nilalele madodana kaJakobe,

lalelani uyihlo u-Israyeli.

₃“Wena Rubeni uyizibulo lami,

ungamandla ami,

engabonakalisa ngawo ubudoda bami,

uyingqongqo, unesithunzi,

ingqongqo enamandla ukubedlula bonke.

₄Ubikizela njengamanzi omfula,

kodwa ngeke usaba yingqongqo,

ngoba wakhwela embhedeni kayihlo,

wawungcolisa;

wakhwela embhedeni wami.

₅“USimeyoni noLevi yizelamani,

izinkemba zabo ziyizikhali zobudlova.

₆Umphefumulo wami mawungangeni emkhandlwini wabo,

ungazibandakanyi nomgwamanda wabo,

ngoba ekuthukutheleni kwabo babulala abantu,

bagenca izinkabi imisipha.

₇Maluqalekiswe ulaka lwabo

ngokuba luyavutha,

nentukuthelo yabo

ngokuba iwunya.

Ngizobehlukanisela kwaJakobe,

ngibahlakazele kwa-Israyeli.

₈“Juda, abafowenu bayokudumisa.

Isandla sakho siyohlala

entanyeni yezitha zakho,

amadodana kayihlo akukhothamele.

₉UJuda uyibhongo lengonyama.

Wenyuke empangweni ndodana yami.

Uguqe, wacutha njengengonyama nanjengengonyamakazi,

ngubani ongake akuvuse na?

₁₀Intonga yobukhosi ngeke isuke kuJuda,

nodondolo lombuso ngeke lugudluzwe

phakathi kwezinyawo zakhe,

kuze kufike lowo ubukhosi obungobakhe;

nezizwe ziyakumlalela.

₁₁Ubophela ithole lembongolo yakhe emvinini,

nethole lembongolo emvinini wekhethelo.

Uhlanza izingubo zakhe ewayinini,

nezambatho zakhe ngegazi lezithelo zomvini.

₁₂Amehlo akhe ayakuba bomvu yiwayini,

amazinyo akhe abe mhlophe kunobisi.

₁₃“UZabuloni uyokwakha ngasogwini lolwandle,

abe ngasechwebeni lemikhumbi,

imingcele yakhe iyoze ishaye eSidoni.

₁₄“U-Isakhari uyimbongolo enamandla,

elala phakathi kwezibaya.

₁₅Uzothi angabona ukuthi izwe lihle,

liyindawo yokuphumula,

athobise ihlombe lakhe,

ukuze athwale umthwalo,

aphenduke isigqila esingakhokhelwa.

₁₆“UDani uyohola abantu bakhe

njengesinye sezizwana zakwa-Israyeli.

₁₇UDani uyoba yinyoka ngasendleleni,

ihobosha emzileni eliluma izithende zehhashi,

ukuze umgibeli walo awe nyovane.

₁₈Nkulunkulu,

ngiyilindele ngokulangazelela

insindiso yakho.

₁₉“UGadi uyogaselwa yiviyo,

kodwa yena uyolihlasela selibaleka.

₂₀“U-Asheri uyokudla okunonileyo,

akhiqize ukudla okufanele amakhosi.

₂₁“UNafethali uyindluzelekazi ekhululekileyo,

ekhuluma amazwi amnandi.

₂₂“UJosefa ungumuthi othelayo,

ongasesiphethwini,

omagatsha awo akhwela odongeni.

₂₃Abacibayo bamhlasela kanzima,

bembambele amagqubu,

futhi bangamaciko okuciba.

₂₄Nokho wawubamba umcibisholo wakhe,

zaqiniswa izingalo zakhe

ngonaMandla kaJakobe,

okuvela kuye uMelusi oyidwala lika-Israyeli,

₂₅ngoNkulunkulu kayihlo ozokusiza,

ngoSomandla ozokubusisa

ngezibusiso zasezulwini phezulu,

nezibusiso zasemajukujukwini omhlaba,

nangezibusiso zamabele nezesibeletho.

₂₆Izibusiso zikayihlo ziqinile

kunezibusiso zokhokho bami,

zifinyelela ezintabeni zaphakade.

Sengathi lezi zibusiso,

zingehlela ekhanda likaJosefa,

nasebunzini lakhe owehlukaniswa kubafowabo.

₂₇“UBhenjamini uyimpisi entwengulayo;

ekuseni udla akubambileyo,

kusihlwa ahlukanise akuphangileyo.”