UHoziya 11

₁“Lapho u-Israyeli esengumntwana ngamthanda;

ngayibiza indodana yami

ukuba iphume eGibhithe.

₂Lapho bebabiza, basuka kubo;

bayohlabela oBhali,

bashisela nezithombe ezibaziweyo impepho.

₃Kepha yiMina engacathulisa u-Efrayimi;

ngabagona ngezingalo zami,

kodwa abazanga ukuthi ngabaphulukisa.

₄Ngabadonsa ngezintabo zomuntu,

ngamagoda othando;

ngaba kubo njengophakamisa

ijoka entanyeni yabo,

ngakhothamela kuye,

ngamnika ukudla.

₅“Abayukubuyela eGibhithe,

i-Asiriya libe yinkosi yabo,

njengoba benqaba ukuphenduka na?

₆Inkemba iyophenduphenduka

idle lubi emizini yabo,

ishabalalise imigoqo yabo,

ibashwabadele ngenxa yamaqhinga abo.

₇Abantu bami baphikelele ukuhlubuka kimi,

noma bangambiza kangakanani oPhezukonke,

ngeke abaphakamise.

₈“Ngingakuyekela kanjani, Efrayimi,

ngikukhaphele kanjani, Israyeli na?

Ngingakwenza kanjani ube njenge-Adima,

ngikwenze kanjani ube njengeZebhoyimi na?

Inhliziyo yami iyaphenduka ngaphakathi kimi,

sonke isihawu sami sivusiwe.

₉Ngeke ngisaqhubeka nolaka lwami oluvuthayo,

noma ngibhubhise u-Efrayimi,

ngokuba nginguNkulunkulu,

angisiye umuntu,

ngingongcwele phakathi kwenu,

angiyukufika ngolaka.

₁₀Bayakulandela uSimakade oyakubhonga njengengonyama,

ngokuba uyakubhonga,

qede kubuye abantwana bakhe bethuthumela,

bevela entshonalanga.

₁₁Bayakuza bethuthumela njengenyoni

bevela eGibhithe,

njengejuba bephuma e-Asiriya,

ngiyakubahlalisa ezindlini zabo,” kusho uSimakade.

₁₂U-Efrayimi ungizungeze ngamanga,

nendlu ka-Israyeli ngenkohliso;

uJuda uvukelana noNkulunkulu

noNgcwele othembekileyo.