U-Izaya 2

₂Kuyothi ngezinsuku zokugcina,

intaba yendlu kaSimakade

imiswe njengephakeme kunezintaba,

iphakame kunamagquma;

zonke izizwe ziyakugobhozela kuyo.

₃Abantu abaningi bayofika, bathi:

“Wozani senyukele entabeni kaSimakade,

endlini kaNkulunkulu kaJakobe,

ukuze asifundise izindlela zakhe,

sihambe emikhondweni yakhe,”

ngokuba umthetho uyakuphuma eZiyoni,

nezwi likaSimakade, eJerusalema.

₄Uyokwehlulela phakathi kwezizwe,

axazulule imibango yezizwe eziningi.

Ziyocangcatha izinkemba zazo zibe ngamageja,

nemikhonto yazo ibe ngocelemba.

Isizwe asiyukuphakamisela esinye inkemba,

zingabe zisaviviselwa ukulwa.

₅Wena ndlu kaJakobe,

woza sihambe ekukhanyeni kukaSimakade.

₆Ubalahlile abantu bakho,

indlu kaJakobe,

ngokuba isigcwele imikhuba yasempumalanga;

sebengabalumbi njengamaFilisti,

bamdibimunye nabantwana babezizwe.

₇Izwe lakubo ligcwele isiliva negolide,

ingcebo yabo ayinakubalwa;

izwe labo ligcwele amahhashi,

izinqola zabo zempi azinakubalwa.

₈Izwe lakubo ligcwele izithombe ezibaziweyo;

bakhothamela umsebenzi wezandla zabo,

owenziwe yiminwe yabo.

₉Ngakho-ke bonke abantu bathotshisiwe,

bonke behliswa isithunzi;

ungabathetheleli.

₁₀Ngena edwaleni, ucashe othulini,

ngenxa yokwesabeka kukaSimakade

nenkazimulo yobukhosi bakhe.

₁₁Amehlo omuntu oziphakamisayo azakuthotshiswa,

nokuzidla kwabantu kufojiswe;

nguSimakade kuphela oyophakama ngalolo lusuku.

₁₂Ngokuba uSimakade Wamabandla umise usuku

ayakumelana ngalo nabo bonke

abazidlayo, abazigqajayo nabazikhukhumezayo,

bonke bayothotshiswa;

₁₃amelane nayo yonke imisedari eLebhanoni

ezidlayo nephakemeyo,

nayo yonke imi-okhi eBhashani,

₁₄nazo zonke izintaba eziphakemeyo,

nawo wonke amagquma aphakemeyo,

₁₅nayo yonke imibhoshongo ephakemeyo,

nazo zonke izingange eziqinisiweyo,

₁₆nemikhumbi yonke eTharishishi,

nazo zonke izinto ezinxanelekayo.

₁₇Ukuzidla kwabantu kuyothotshiswa,

nokuzikhukhumeza kwabantu kuyofojiswa;

nguSimakade kuphela oyophakanyiswa ngalolo lusuku.

₁₈Izithombe ezibaziweyo ziyoshabalala.

₁₉Abantu bayongena emigedeni esemadwaleni,

nasemigodini emhlabathini,

bebalekela ukwesabeka kukaSimakade

nenkazimulo yobukhosi bakhe,

lapho ephakama ukuthuthumelisa umhlaba.

₂₀Ngalolo lusuku

abantu bayozilahla ezimvukuzaneni nasemalulwaneni,

izithombe zabo zesiliva

nezithombe zabo zegolide,

abazenzele zona ukuba bazikhonze.

₂₁Bayongena emihumeni esemadwaleni

nasemifantwini yamawa,

bebalekela ukwesabeka kukaSimakade

nenkazimulo yobukhosi bakhe,

lapho ekhuphuka ukuthuthumelisa umhlaba.

₂₂Bayekeni abantu abamphefumulo usemakhaleni abo,

ngokuba bayini nje nempela?