U-Izaya 25

₁Wena Simakade unguNkulunkulu wami;

ngizokuphakamisa ngilidumise igama lakho,

ngokuba wenze izimangaliso ezacetshwa emandulo,

ngokwethembeka nangeqiniso.

₂Ngokuba umuzi uwuphendule imvithi,

umuzi obiyelweyo waba yincithakalo;

umuzi wabafokazi awuseyiwo umuzi,

awusoze wakhiwa kabusha nanini.

₃Ngakho-ke izizwe ezinamandla ziyokudumisa,

imizi yezizwe ezinonya ikwesabe.

₄Ngokuba ube yinqaba kwabampofu,

inqaba kwabantulayo ekuxakekeni kwabo,

umpheme esivunguvungwini

nomthunzi ekushiseni,

lapho umoya wabanonya

unjengesivunguvungu ebusika,

₅Umsindo wabafokazi

ufana nokushisa ezweni elomileyo,

uyodambisa ukushisa ngomthunzi wamafu,

uthulise nehubo labanonya.

₆Kule ntaba kaSimakade Wamabandla

uyokwenzela zonke izizwe idili

ngokukhulupheleyo nokunomnkantsha,

idili lewayini eliqoqodileyo,

elinenhlese ecwengekileyo.

₇Uyobhubhisa kule ntaba

isembozo esemboze bonke abantu,

nomgubuzelo ogubuzele zonke izizwe.

₈Ukufa kuyokugwinywa kuze kube phakade.

INkosi uSimakade iyokuzesula izinyembezi

ebusweni bonke,

isuse ihlazo labantu bayo

emhlabeni wonke

ngokuba uSimakade ukhulumile.

₉Kuyothiwa ngalolo lusuku:

“Bheka, lo unguNkulunkulu wethu;

simlindele, futhi uyakusisindisa, sisinde.

Masijabule, sithokoze ngensindiso yakhe.”

₁₀Ngokuba isandla sikaSimakade

siyophumula phezu kwale ntaba.

AbakwaMowabi bayodovadovwa endaweni yakubo,

njengenqwaba yotshani bunyathelwa endundumeni yobulongwe.

₁₁Noma bephakamisa izandla zabo,

bephakathi kwayo njengababhukudayo,

bevula izandla zabo bebhukuda,

ukuphakama kwabo kuyothotshiswa

naphezu kokuba begwedla

kangaka ngezandla zabo.

₁₂Izinqaba eziphakemeyo

ezingangeni zakhe ziyobhidlizwa,

ziyakuwiselwa phansi

zidicilelwe emhlabathini,

ngisho othulini imbala.