U-Izaya 46

₁UBheli uyaguqa,

uNebho uyakhothama;

izithombe zabo ezibaziweyo

zingezezilwane nezezinkomo;

lezi zinto enizithweleyo

zingumthwalo onzima ezilwaneni ezikhatheleyo.

₂Bayazikhothamela, baguqe kanyekanye;

azinakuwukhulula umthwalo,

kodwa nabo luqobo baya ekuthunjweni.

₃“Ngilalele, wena ndlu kaJakobe,

yonke insali yabendlu ka-Israyeli

engayimitha ngaze ngayizala,

ngayithwala esibelethweni.

₄Niyoze niguge nginguye,

yebo, niyoze nibe yizimpunga, ngiyakunithwala;

ngikwenzile lokhu,

futhi ngiyakunetshatha,

yebo, ngiyakunithwala, nginikhulule.

₅“Niyongifanisa nobani,

niyongilinganisa nobani,

ningiqhathanise nobani ukuba sifane na?

₆Abathulula igolide esikhwameni,

balinganise isiliva esilinganisweni,

baqashe umkhandisiliva ukuba enze unkulunkulu,

bese bekhothama, bakhuleke.

₇Bamthwala ehlombe, bametshathe,

bambeke endaweni yakhe

ukuba ame lapho,

angabe esasuka endaweni yakhe;

kodwa uma umuntu ekhala kuye,

akayukumphendula,

akanakumsindisa osizini lwakhe.

₈“Khumbulani lokhu, nime isibindi,

cabangani futhi ezinhliziyweni zenu,

nina benzi bokubi.

₉Khumbulani izinto zakuqala, zasemandulo,

ngokuba nginguNkulunkulu,

akekho omunye,

nginguNkulunkulu,

akekho onjengami,

₁₀owamemezela phambilini okuyakuza,

nasendulo izinto ezingakenziwa, ethi:

‘Icebo lami liyakuma,

ngiphumelelise yonke intando yami,

ngifeze zonke izimfiso zami,

₁₁obiza inqe empumalanga

nomuntu engizofeza ngaye icebo lami

ezweni elikude;

ngikhulumile, ngiyokukwenza lokhu;

nginqumile, ngiyakukufeza.

₁₂Ngilaleleni nina abanhliziyo zilukhuni,

nina enikude nokulunga.

₁₃Ngikusondezile ukulunga kwami, akukho kude,

insindiso yami ayiyukulibala.

Ngiyonika iZiyoni insindiso,

nodumo lwami ku-Israyeli.’ ”