U-Izaya 58

₁“Memeza, ungazibambi,

liphakamise izwi lakho njengecilongo,

batshele abantu bami iziphambeko zabo,

nendlu kaJakobe izono zayo.

₂Nokho bayangifuna nsuku zonke,

bayakuthokozela ukwazi izindlela zami,

ngokungathi bayisizwe esenza ukulunga,

esingazishiyanga izimiso zikaNkulunkulu waso.

Babuza kimi izehlulelo ezilungileyo,

bayakuthokozela ukusondela kukaNkulukulu.

₃Bathi: ‘Sikuzileleni ukudla,

ngoba awuboni na?’

‘Sizithobeleni,

ngoba awusinaki na?’

“Bhekani, ngosuku enizila ngalo,

nenza enikuthandayo,

nicindezele zonke izisebenzi zenu.

₄Niyabona-ke, nizilela ukuphikisana, nokulwa,

nokushaya ngenqindi yenkohlakalo.

Lokhu kuzila enikwenza namuhla

akwenzi ukuba izwi lenu

lizwakale ezindaweni eziphakemeyo.

₅Ngabe yikhona kuzila lokhu

engikukhethileyo na?

Ngabe wusuku lokuba umuntu athobise umphefumulo na?

Ngabe kungukuba

agebise ikhanda lakhe njengomhlanga,

alale endwangwini eyisaka nasemlotheni na?

Ngabe yikho lokhu yini enikubiza ngokuzila,

nosuku olwemukelekileyo kuSimakade na?

₆“Ukuzila engikukhethileyo akukhona yini lokhu:

ukuthukulula izibopho zenkohlakalo,

ukukhumula izitilobho ejokeni,

ukukhulula abacindezelweyo,

nokuphula wonke amajoka na?

₇Akusikho yini ukwabelana

nabalambileyo isinkwa sakho,

ukungenisa abampofu nemihambima ekhaya lakho,

lapho ubona ohambaze umembathise,

nokungazifihli ezihlotsheni zakho na?

₈Khona ukukhanya kwakho kuyovela njengokusa,

nokuphiliswa kwakho kuyovela masinyane,

ukulunga kwakho kuyokukwendulela,

inkazimulo kaSimakade ibe ngasemuva kwakho.

₉Khona uyakumemeza, kusabele uSimakade;

uyakukhala, bese ethi:

‘Bheka, ngilapha.’

“Uma ususa ijoka phakathi kwenu,

ukukhombana ngeminwe,

nokukhuluma kabi,

₁₀unike olambileyo ukudla kwakho,

usuthise othotshisiweyo;

khona ukukhanya kwakho

kuyovela ebumnyameni,

ukuhlwa kwakho kufane nemini.

₁₁USimakade uyokuhola njalo,

anelise okuntulayo ezindaweni ezomileyo,

aqinise amathambo akho.

Uyakuba njengensimu eniselweyo

nanjengomthombo wamanzi,

omanzi awo engashi.

₁₂Abanye phakathi kwenu bayokwakha kabusha

incithakalo yezakhiwo zasemandulo;

uyakuvusa izisekelo zezizukulwane ngezizukulwane,

uyobizwa ngokuthi unguMvuseleli wezingange,

noMlungisi wemigwaqo

ukuba kuhlalwe kukho.

₁₃“Uma uzinqanda ekungcoliseni isabatha,

ungenzi umsebenzi wakho

ngosuku lwami olungcwele;

isabatha ulibize ngokuthi yintokozo,

nosuku olungcwele lukaSimakade

ngokuthi luhloniphekile, uluhloniphe;

ungahambi ngezindlela zakho,

wenza okuthandwa nguwe

noma imisebenzi yakho,

₁₄khona uyakuzijabulisa kuSimakade,

ngiyokukhweza ezindaweni eziphakemeyo zomhlaba,

ngikuphe ukuba udle ifa likaJakobe uyihlo,”

ngokuba umlomo kaSimakade ukhulumile.