UJeremiya 47

“Bheka, amanzi ayenyuka enyakatho,

azakuba ngumfula okhukhulayo,

azokhukhula izwe nokukulo,

umuzi nabakhe kuwo.

Abantu bayakukhala;

bonke abakhe ezweni

bayakukhala, bakhihle isililo.

₃Ngomsindo wokugabadula

kwezinselo zamahhashi akhe anamandla,

ngobukhehlekhehle bezinqola zakhe,

nangomsindo wamasondo akhe;

oyise ababheki emuva kubantwana,

ngenxa yobuntekenteke bezandla zabo,

₄nangenxa yosuku oluzayo

ukuzobhubhisa wonke amaFilisti,

nokuqeda iThire neSidoni,

bonke abasizi abasalayo;

ngokuba uSimakade uyakuwabhubhisa amaFilisti,

insali yesiqhingi iKhafithori.

₅IGaza iyakuba nempandla,

i-Ashikeloni lishabalele,

wena nsali yensali yesigodi sabo,

uyakuzisika kuze kube nini na?

₆“Awu wena nkemba kaSimakade,

kuyoze kube nini ungathuli na?

Buyela emgodleni wakho,

uthule, uzole.

₇Kepha ingaphumula kanjani,

ngokuba uSimakade uyalezile na?

Uyijubile e-Ashikeloni, nasogwini lolwandle.”