UJobe 10

₁“Ngiyakuzonda ukuphila kwami,

ngizokhononda ngokukhululeka,

ngizokhuluma ebumunywini bomphefumulo wami.

₂Ngiyakuthi kuNkulunkulu:

‘Ungangilahli njengonecala, kodwa ngazise;

kuyini ongiphikisa ngakho na?

₃Kuhle yini kuwe ukuba ucindezele,

ulahle umsebenzi wezandla zakho,

uphumelelise icebo lezikhohlakali na?

₄Unawo yini amehlo enyama na?

Uyabona yini njengabantu na?

₅Imihla yakho injengemihla yomuntu na?

Neminyaka yakho injengezinsuku zabantu na?

₆Kungani ungiphenya, ufunisisa ngesono sami,

₇noma wazi kahle ukuthi anginacala,

futhi akekho ongangihlenga esandleni sakho na?

₈Izandla zakho zingibumbile,

zangenza ngokupheleleyo nxazonke,

nokho uyangibhubhisa.

₉Ake ukhumbule ukuthi nguwe

owangibumba njengobumba,

pho uyakungibuyisela othulini na?

₁₀Awungithululanga yini njengobisi,

wangijiyisa njengoshizi na?

₁₁Awungembathisanga yini isikhumba nenyama,

wangiphica ngamathambo nangemisipha na?

₁₂Ungiphe impilo, wangenzela umusa,

ukunginakekela kwakho kuwulondile umoya wami.

₁₃Kepha lokhu ukufihlile enhliziyweni yakho,

ngiyazi ukuthi lokhu ubukusophile:

₁₄uma ngona, uyangiqaphela,

awuyukungithethelela isono sami.

₁₅Uma ngenzile okubi, maye kimi!

Uma bengilungile,

bengingayukuliphakamisa ikhanda lami,

lokhu ngisuthi ihlazo,

ngibona ukuhlupheka kwami.

₁₆Nokuba bengiziphakamisa,

ubuyakungizingela njengengonyama,

ubuye uzenze omangalisayo kimi.

₁₇Ubuyakuletha kimi ofakazi abasha,

wandise intukuthelo yakho kimi,

amaviyo ngamaviyo angithelekele.

₁₈“ ‘Wangivumelelani ukuba ngizalwe,

ngiphume esibelethweni na?

Ngangingafi ngani ngingakabonwa nangelilodwa iso na?

₁₉Kwakuyoba sengathi angikaze ngibe khona,

ngiphume esibelethweni,

ngiyiswe ethuneni.

₂₀Izinsuku zokuphila kwami aziyingcosana yini na?

Ake ungiyeke,

kengithole ukuthokoza kancane nje,

₂₁ngaphambi kokuba ngihambe,

ngingaphinde ngibuye,

ngiye ezweni lobumnyama nesigayegaye,

₂₂izwe lobumnyama nesiphithiphithi sobumnyama,

lapho ukukhanya kufana nobumnyama.’ ”