UJobe 16

₂“Ngizizwile izinto eziningi ezinjengalezi,

nonke ningabaduduzi ababi.

₃Awukho yini umkhawulo emazwini ayize na?

Ucunulwa yini ukuze ungiphendule na?

₄Nami bengingakhuluma njengani,

ukuba benisesikhundleni sami,

bengingayihlanganisa inkulumo,

ngimelane nani,

ngininikinele ikhanda.

₅Benginganikhuthaza ngomlomo,

induduzo yezindebe zami

idambise izinhlungu zenu.

₆“Uma ngikhuluma,

ubuhlungu bami abuyukudanjiswa,

nalapho ngithula,

bungakanani obusukayo kimi na?

₇Nokho manje uNkulunkulu ungikhathazile,

yonke indlu yami uyenze incithakalo.

₈Ungibambile, lokhu kungubufakazi,

ukuzaca kwami kumile kungubufakazi

phambi kwami.

₉Ulaka lwakhe luyadwengula, luyangisibekela,

ungiququdela amazinyo,

isitha sami singihlahlela amehlo.

₁₀Bangikhamisela imilomo, bengiklolodela,

bangishaya esihlathini, bengigcona,

bayangihlanganyela.

₁₁UNkulunkulu unginikele kubantu abonakeleyo,

ungiphonse esandleni sezikhohlakali.

₁₂Ngangihlezi kahle, wangiphihliza,

ungibambe ngentamo, wangiphahlaza,

ungimise ngaba yinkololo yakhe.

₁₃Abacibishelayo bakhe bangihaqile,

uqhekeze izinso ngokungenaluzwelo,

inyongo yami uyichithe emhlabathini.

₁₄Ungishaya ephindelela,

ungidumela njengeqhawe.

₁₅“Ngithungele indwangu eyisaka esikhumbeni sami;

ngabeka amandla ami othulini.

₁₆Ubuso bami buklwele babomvu ngukukhala,

kunobumnyama obukhulu ezinkopheni zami,

₁₇nakuba kungekho budlova ezandleni zami,

nokukhuleka kwami kulungile.

₁₈Mhlaba, uze ungaligqibi igazi lami,

ukukhala kwami makungayitholi indawo yokuphumula.

₁₉Ngisho manje, ufakazi wami usezulwini,

ummeli wami usezindaweni eziphakemeyo.

₂₀Abangani bami bayangiklolodela,

iso lami liphophoza izinyembezi kuNkulunkulu,

₂₁ukuze abeke udaba lomuntu kuNkulunkulu,

njengomuntu ekhulumela umngani wakhe.

₂₂Ngokuba sekusele iminyaka embalwa,

ngithathe indlela engingenakubuya kuyo.”