UJobe 20

₂“Imicabango yami engihluphayo ingenza

ngishe amashushu ngokukuphendula,

ngenxa yokuba ngikhathazeke kakhulu.

₃Sengizizwile izinsolo zakho ezingithunazayo,

kodwa manje umoya wami

wokuqonda ungenza ngiphendule.

₄“Awazi yini lokhu

ukuthi kusukela emandulo,

lapho kubekwa abantu emhlabeni,

₅ukuthi ukujabula kwezikhohlakali kufushane,

nokuthokoza kwabangenankulunkulu kungokomzuzwana nje na?

₆Noma ukuphakama kwakhe kungakhuphukela ezulwini,

nekhanda lakhe lifinyelele emafini,

₇uyakubhubha kuze kube phakade,

njengendle yakhe;

abambonayo bayakuthi:

‘Ukuphi na?’

₈Uyakundiza njengephupho, angafunyanwa,

axoshwe njengombono wasebusuku.

₉Iso elimbonile alisayukuphinde limbone,

nendawo yakhe ayisayukumbona.

₁₀Abantwana bakhe bayonxephezela abampofu,

izandla zabo ziwubuyisele kubo

umcebo wakhe.

₁₁Amathambo akhe ayogcwala ugqozi lobusha,

kodwa ayolala othulini kanye naye.

₁₂“Noma ububi bumnandi emlonyeni wakhe,

ebufihla phansi kolimi lwakhe,

₁₃noma ebugodla engabushiyi,

ebugcina emlonyeni wakhe,

₁₄nokho ukudla kwakhe kuyomphendukela esiswini,

kube ngubuthi bezimfezi ezibilini zakhe.

₁₅Umcebo awugwinyile, uyobuye awuhlanze,

nguNkulunkulu oyakuwukhipha esiswini sakhe.

₁₆Uncela isihlungu sezimfezi,

abulawe wulimi lwenyoka.

₁₇Akayukuyibuka imifula nemifudlana

egeleza uju nezaqheqhe.

₁₈Ubuyisa konke akukhandlekelayo, engakakugwinyi,

akayukujabula ngempahla ayitholileyo.

₁₉Ngokuba ubacindezele,

wabalahla abampofu,

udle indlu angazange ayakhe.

₂₀“Ngokuba akakwazi ukuthula ngaphakathi kwakhe,

kulokho akufisayo akuphumeleli lutho.

₂₁Akusalanga lutho angaludlanga,

ngakho-ke impumelelo yakhe ayinakuma.

₂₂Kuyothi kusamhambela kahle,

ehlelwe yizinhlupheko;

izandla zabo bonke abahluphekayo ziyakuza kuye.

₂₃UNkulunkulu uyakugcwalisa isisu sakhe ngezinhlupheko,

anise ukuvutha kwentukuthelo yakhe

phezu kwakhe.

₂₄Uyakubalekela isikhali sensimbi,

kodwa agwazwe ngumnsalo wethusi.

₂₅Uwubhoncula uphume ngasemhlane,

awubone ubengezela igazi lakhe,

maqede akhungathwe yingebhe.

₂₆Ubumnyama obupheleleyo buyakuba phezu komcebo

wakhe wonke,

umlilo ongavuthelwanga muntu uyakumqothula,

okuseleyo ethendeni lakhe

kushe kungqongqe.

₂₇Izulu liyoveza obala isiphambeko sakhe,

umhlaba umelane naye.

₂₈Ifa lendlu yakhe liyoshabalala, linyamalale

ngosuku lwentukuthelo kaNkulunkulu.

₂₉Lesi yisabelo somuntu okhohlakele,

esivela kuNkulunkulu,

nefa alimiselwe nguNkulunkulu.”