UJobe 3

₃“Malubhubhe usuku engazalwa ngalo,

nobusuku okwathiwa:

‘Ukhulelwe ingane yomfana.’

₄Lolo lusuku malube ngubumnyama,

uNkulunkulu ephezulu makangalunaki,

ukukhanya makungakhanyi kulo.

₅Ubumnyama nethunzi lokufa makunikwe lona,

kuhlale ifu phezu kwalo,

ubumnyama bosuku bulethuse.

₆Lobo busuku mabubanjwe yisigayegaye sobumnyama,

bungathokozi phakathi kwezinsuku zonyaka,

lungabalwa phakathi kwezinsuku zenyanga.

₇Yebo, lobo busuku

mabube yinyumba,

kungezwakali msindo wenjabulo kubo.

₈Mabaluqalekise labo abaqalekisa usuku,

labo abalungele ukuvusa uLeviyathani.

₉Izinkanyezi zokuhwelela kobusuku

maziphenduke ubumnyama,

mabulindele ukukhanya

kodwa kungabi bikho,

mabungakuboni ukuntwela kokusa,

₁₀ngokuba abuzivalanga izivalo zesizalo sikamame,

abuyifihlanga inkathazo emehlweni ami.

₁₁“Kungani ngingafelanga esiswini na?

Angibhubhanga ngani lapho ngiphuma esizalweni na?

₁₂Amadolo angemukelelani,

namabele ukuba ngincele na?

₁₃Ngokuba manje

ngabe ngilele, ngithule,

ngabe ngilele ubuthongo, ngiphumule

₁₄kanye namakhosi nabeluleki bomhlaba,

labo abazakhela kabusha

izindawo ezazicekelwe phansi,

₁₅noma kanye nezikhulu ezinegolide,

ezazigcwalise izindlu zazo ngesiliva;

₁₆noma kungani ngingagcwatshwanga njengokuphuphumileyo

nanjengombungu ongalibonanga ilanga?

₁₇Lapho izikhohlakali zingasakwazi ukuhlupha,

nalapho abakhathele besekuphumuleni.

₁₈Lapho iziboshwa zicanasa khona ndawonye,

nezwi labacindezelayo zingasalizwa.

₁₉Lapho abancane nabakhulu befana;

isigqila sikhululekile kumniniso.

₂₀“Kungani ukukhanya kunikwa ososizini,

nokuphila, kwabanomunyu emphefumulweni,

₂₁abalangazelela ukufa,

kodwa kungafiki,

abakufuna ukwedlula

ingcebo ethukusiweyo,

₂₂abathokoza, bethabe,

bajabule uma bethola ingcwaba?

₂₃Kungani ukukhanya kunikwa umuntu

ongayiboni indlela yakhe,

lowo uNkulunkulu ambiyele nxazonke na?

₂₄Ukugquma kimi sekufana nokudla,

nokububula kwami

kuphophoza njengamanzi.

₂₅Ngehlelwa yilokho engikwesabayo,

nalokho enginovalo ngakho kuyangehlela.

₂₆Anginakuthula, anginaluxolo, anginakuphumula;

inkathazo ingehlele.”