UJobe 36

₂“Ngibekezelele kancane, ngizokukhombisa,

ngokuba ngisenamazwi okumela uNkulunkulu.

₃Ngizolulanda kude ulwazi lwami,

ngikunike uMenzi wami ukulunga.

₄Impela ayikho inkohliso emazwini ami;

onolwazi olupheleleyo unawe.

₅“Bheka, uNkulunkulu unamandla,

kodwa akukho muntu ambukela phansi,

mkhulu emandleni okuqonda.

₆Akazigcini izigilamkhuba ziphila,

kepha abahluphekayo ubenzela ubulungiswa.

₇Amehlo akhe akawasusi kwabalungileyo,

kodwa ubahlalisa namakhosi

ezihlalweni zobukhosi,

baphakame, kuze kube phakade.

₈Uma beboshwa ngamaketango,

babanjwe yizintambo zokuhlupheka,

₉lapho uyababonisa izenzo zabo

neziphambeko zabo

ukuthi baziphakamisile.

₁₀Uyazivula izindlebe zabo

ukuze zizwe ukuyalwa,

abayale ukuba baphenduke eziphambekweni zabo.

₁₁Uma belalela, bamkhonze,

imihla yabo iyophetha ngempumelelo

neminyaka yabo, bethokozile.

₁₂Kepha uma bengalaleli,

bayobhubha ngenkemba,

bafe bengenalwazi.

₁₃“Abangenakulunga enhliziyweni baqongelela ulaka,

abakhali bacele usizo lapho ebabopha.

₁₄Bafa besebasha, ukuphila kwabo

kuphelele ehlazweni.

₁₅Ukhulula ompofu ngobuphofu bakhe,

avule indlebe yabo ngokuhlupheka.

₁₆“Impela uyakukukhulula osizini,

akubeke endaweni ebanzi,

lapho kungekho ukunyinyeka khona,

kubekwe okunonile etafuleni lakho.

₁₇Kepha wena uhluphekile ngokuthi

izikhohlakali ziyakujeziswa yini;

ukwehlulela nobulungiswa kuyokwenziwa.

₁₈Qaphela ingcebo, ingakuyengi,

ungachezukiswa ngubukhulu bokufunjathiswayo.

₁₉Ukuceba kwakho,

nayo yonke imizamo yezikhwepha zakho,

kungakusiza yini ukuba ungabi sosizini na?

₂₀Ungabulangazaleli ubusuku lapho abantu

bebhujiswa ezindaweni zabo.

₂₁Qaphela, ungaphendukeli ebubini,

ngokuba ngalokho uyobe uzikhethele usizi.

₂₂“UNkulunkulu uphakeme ngamandla akhe;

ngubani ofundisa njengaye na?

₂₃Ngubani ombekele indlela azohamba ngayo na?

Ngubani ongathi:

‘Wenze okungalungile’ na?

₂₄Khumbula ukudumisa imisebenzi yakhe

abahlabelela ngayo abantu.

₂₅Bonke abantu bayibonile,

bonke bayibukela kude.

₂₆Bheka, uNkulunkulu uphakeme, asimqondi,

ubungako beminyaka yakhe abunakuphenywa.

₂₇“Wenyusa amathonsi amanzi,

abuye awathulule njengemvula enkungwini yakhe.

₂₈Amafu uwenza aconse,

awathululele phezu kwabantu abaningi.

₂₉Ukhona yini ongakuqonda ukuthi

amafu uweneke kanjani,

nokuduma kwedokodo lakhe na?

₃₀Umbani wakhe uyawusabalalisa umzungeze,

amboze izisekelo zolwandle.

₃₁Ngokuba ngalokho ubusa abantu,

abaphe ukudla okuningi.

₃₂Usibekela izandla zakhe ngombani,

awuyale ukuba ushaye inkololo.

₃₃Ukuduma kwawo kulanda ngaye,

isiphepho sibikezela ngolaka lwakhe.”