ILevithikhusi 8

₁USimakade wakhuluma kuMose, wathi: ₂“Thatha u-Aroni namadodana akhe, izembatho, amafutha okugcoba, inkunzi yomnikelo wesono, izinqama ezimbili, neqoma lezinkwa ezingenamvubelo, ₃uqoqele yonke inhlangano emnyango wethende lokuhlangana.”

₄UMose wenza njengalokhu uSimakade emyalile; waqoqela inhlangano ngasemnyango wethende lokuhlangana.

₅UMose wathi enhlanganweni: “Nakhu uSimakade ayale ukuba kwenziwe.”

₆UMose waletha u-Aroni namadodana akhe, wabageza ngamanzi. ₇Wamgqokisa ibhantshi, wambopha ngebhande okhalo, wamembathisa ijazi, wamfaka ingubo yamahlombe, wambhincisa ibhande lengubo yamahlombe elihlotshisiweyo, wayibopha ngalo. ₈Wamfaka isivikelo sesifuba, wafaka kuso i-Urimi neThumimi. ₉Wamethwesa iqhiya ekhanda, ngaphambili ebunzini wamfaka ucwecwe lwegolide, umqhele wobungcwele, njengalokho uSimakade ayemyalile uMose.

₁₀UMose wathatha amafutha okugcoba, wagcoba ithabanakeli nakho konke okwakuphakathi kulo, wakungcwelisa. ₁₁Wafafaza ngamanye i-althare kasikhombisa, waligcoba i-althare nazo zonke izitsha zalo, nomcengezi nesinqe sawo, ukuba kungcweliswe. ₁₂Wathela amanye amafutha okugcoba ekhanda lika-Aroni, wamgcoba, wamhlukanisela umsebenzi. ₁₃UMose waletha namadodana ka-Aroni, wawagqokisa amabhantshi, wawabopha ngamabhande, wawafaka izigqoko njengalokhu uSimakade ayemyalile.

₁₄UMose wenza ukuba kusondezwe inkunzi yomnikelo wesono; u-Aroni namadodana akhe babeka izandla zabo enhloko yenkunzi yomnikelo wesono. ₁₅UMose wayihlaba, wathatha igazi walibheca ngomunwe wakhe ezimpondweni ze-althare nxazonke, walihlambulula i-althare, igazi eliseleyo walithululela esinqeni se-althare, walingcwelisa kanjalo ukuba alenzele ukubuyisana. ₁₆UMose wathatha wonke umhlwehlwe, namanoni aphezu kwesibindi, nezinso zombili amanoni azembozile, wakushisa e-althare. ₁₇Kepha inkunzi nesikhumba sayo, inyama yayo, nomswani wayo, wakushisa ngomlilo ngaphandle kwekamu, njengalokhu uSimakade ayemyalile uMose.

₁₈Wayeseletha inqama yomnikelo wokushiswa; u-Aroni namadodana akhe babeka izandla zabo enhloko yayo. ₁₉UMose wayihlaba, wayesefafaza igazi nxazonke ze-althare. ₂₀Wayihlahlela inqama; inhloko yayo, izitho zayo, namanoni wakushisa. ₂₁UMose wageza ngamanzi ezangaphakathi namanqina, yonke inyama yenqama wayishisa e-althare; yaba ngumnikelo wokushiswa, oyiphunga elimnandi, ingumnikelo womlilo kuSimakade njengalokhu uSimakade ayemyalile uMose.

₂₂Waletha nenqama yesibili, inqama yokubabeka; u-Aroni namadodana akhe babeka izandla zabo enhloko yayo. ₂₃UMose wayihlaba, wathatha ingxenye yegazi layo walibheca endlebeni ka-Aroni yesokunene, nasesithupheni sesandla sokunene, nakuqukula wonyawo lwakhe lwesokunene. ₂₄UMose wayeseletha amadodana ka-Aroni, nawo wawabheca ngegazi ezindlebeni zawo zesokunene, nasezithupheni zezandla zawo zesokunene, nakoqukula bezinyawo zawo zesokunene, wayesefafaza igazi nxazonke ze-althare. ₂₅Wathatha amanoni, umsila ononile, umhlwehlwe, amanoni aphezu kwesibindi, nezinso zombili namanoni azembozile, nomlenze wesokunene, ₂₆wathatha iqebelengwane laba linye eqomeni lezinkwa ezingenamvubelo elaliphambi kukaSimakade, neqebelengwane lesinkwa samafutha laba linye, nekhekheba lalinye, wakubeka phezu kwamanoni, naphezu komlenze wesokunene, ₂₇konke lokhu wakunika u-Aroni namadodana akhe ezandleni, wakuzulazulisa kwaba ngumnikelo wokuzulazuliswa phambi kukaSimakade. ₂₈UMose wakuthatha ezandleni zabo wakushisa e-althare emnikelweni wokushiswa; kwaba ngumnikelo wokubabeka, kwaba yiphunga elimnandi; umnikelo womlilo kuSimakade. ₂₉UMose wathatha isifuba, wasizulisa saba ngumnikelo wokuzulazuliswa phambi kukaSimakade; saba yisabelo sikaMose enqameni yokubabeka njengalokhu uSimakade ayemyalile uMose.

₃₀UMose wathatha amafutha okugcoba, negazi elalise-althare, wafafaza ngalo u-Aroni nezembatho zakhe, namadodana akhe ayenawo lapho nezembatho zawo, wamngcwelisa u-Aroni nezembatho zakhe, namadodana akhe nezembatho zawo.

₃₁UMose wathi ku-Aroni namadodana akhe: “Phekani inyama ngasemnyango wethende lokuhlangana, niyidle lapho nesinkwa esiseqomeni lokwahlukaniselwa, njengalokhu ngayala ngathi: ‘U-Aroni namadodana akhe bayokukudla.’ ₃₂Okuyosala enyameni nasesinkweni niyokushisa ngomlilo. ₃₃Aniyukuphuma emnyango wethende lokuhlangana kuze kuphele izinsuku eziyisikhombisa, ngokuba ukubekwa kuyizinsuku eziyisikhombisa. ₃₄USimakade uyalile ukuba kwenziwe njengalokhu kwenziwe namuhla, ukuze nenzelwe ukubuyisana. ₃₅Niyohlala ngasemnyango wethende lokuhlangana imini nobusuku, izinsuku eziyisikhombisa, nigcine umyalo kaSimakade ukuze ningafi, ngokuba ngiyaliwe kanjalo.”

₃₆U-Aroni namadodana akhe benza konke uSimakade ayeyale ngakho ngesandla sikaMose.