NgokukaLuka 24

₁Kepha ngosuku lokuqala lweviki, kusantwela ezansi, bafika ethuneni bephethe amakha ababewalungisile. ₂Bafica itshe ligingqiwe ethuneni. ₃Kuthe sebengenile, bangasithola isidumbu seNkosi uJesu. ₄Kwathi besakhungathekile yilokho, babona nanko amadoda amabili emi eduze kwabo, egqoke izingubo ezicwebezelayo. ₅Besaba, base bekhothama bathi mbo ngobuso phansi, ayesethi kubo: “Nimfunelani ophilayo kwabafileyo na? ₆Akekho lapha; uvukile. Khumbulani ukuthi wakhuluma wathini kini eseseGalile, ₇ethi: ‘INdodana yomuntu imelwe ukunikelwa ezandleni zabantu abayizoni, ibethelwe, bese ivuka ngosuku lwesithathu.’ ”

₈Base bewakhumbula-ke amazwi akhe.

₉Kuthe sebebuyile ethuneni, babika konke lokho kwabali-11, nakubo bonke abanye. ₁₀KwakunguMariya Magdalena, uJowana, uMariya unina kaJakobe nabanye, ababikela abaphostoli lezo zinto. ₁₁Kepha lawo mazwi eyefana nembudane nje kubaphostoli, abawakholwanga neze. ₁₂Nokho uPhethro wasukuma, wagijima eqonde ethuneni, wafike walunguza, wazibona izindwangu zelineni zisele zodwa. Wayesehamba, waya ekhaya emangele ngokwenzekileyo.

₁₃Kwaba nabafundi ababili ababehamba ngalolo lusuku, beya emzaneni okuthiwa i-Emawuse, ukude neJerusalema, amastadiyu angama-60. ₁₄Babehamba bexoxa ngazo zonke lezo zinto ezehlakeleyo. ₁₅Besakhuluma bebuzana, uJesu uqobo wasondela, wahambisana nabo. ₁₆Kepha wafihlakala kubo, bangambona ukuthi ungubani. ₁₇Wayesethi kubo: “Zindaba zini lezi enihamba nizidingida na?”

Base bema bedangele. ₁₈Omunye wabo, ogama lakhe nguKleyophase, waphendula, wathi kuye: “Ngabe nguwe wedwa yini oyisihambi eJerusalema, ongazazi izinto ezenzekileyo khona kulezi zinsuku na?”

₁₉Wayesethi kubo: “Zinto zini na?”

Bathi: “NgoJesu waseNazaretha, obengumphrofethi onamandla ngezenzo nangezwi phambi kukaNkulunkulu nabantu bonke, ₂₀nokuthi abaphristi abakhulu nababusi bethu bamnikela kanjani ukuba agwetshelwe ukufa, bambethele esiphambanweni. ₂₁Thina-ke besethembile ukuthi nguye ozakuhlenga u-Israyeli. Kepha sekuwusuku lwesithathu zenzekile zonke lezi zinto. ₂₂Phezu kwalokho abesifazane abathile bakithi basethusile, abebeyile ethuneni ekuseni ngovivi. ₂₃Kuthe uma bengasitholi isidumbu sakhe, bafika bathi babone nombono wezingelosi ezithe uyaphila. ₂₄Nabanye bethu bayile ethuneni, bafica kunjengokuba beshilo abesifazane, kodwa Yena uqobo abambonanga.”

₂₅UJesu wayesethi kubo: “Maye, nina eningaqondiyo nenilibele enhliziyweni ukukholwa yikho konke okwashiwo abaphrofethi! ₂₆Kanti uKhristu ubengamelwe yini ukuba ahlupheke ngalokho, bese engena enkazimulweni yakhe na?”

₂₇Wayesebachazela konke okusemibhalweni ngaye, kusukela kuMose nakubaphrofethi bonke.

₂₈Base besondela emzaneni ababeya kuwo. Yena washaya sengathi uyedlula lapho, ₂₉kodwa bamncengisisa, bathi: “Hlala nathi, ngokuba sekuzakuhlwa, nemini isiyadlula.”

Wangena wahlala nabo.

₃₀Kuthe esehleli nabo sebezokudla, wathatha isinkwa, wabonga, wasihlephula, wabanika sona. ₃₁Ayesevuleka amehlo abo, bambona ukuthi ungubani, wayesenyamalala kubo. ₃₂Bathi omunye komunye: “Inhliziyo yethu ibingavuthi yini phakathi kwethu, ngesikhathi ekhuluma nathi endleleni, esichazela imibhalo na?”

₃₃Basuka ngaleso sikhathi, babuyela eJerusalema, bafica abali-11 behlangene ndawonye nabanye ababenabo, ₃₄bethi: “Nembala iNkosi ivukile, izibonakalisile kuSimoni.”

₃₅Base nabo bebalandisa ngokwakwenzeke endleleni, nokuthi bayazi kanjani ukuthi yiyo iNkosi, ngokuhlephula isinkwa.

₃₆Kuthe besakhuluma ngalezi zinto, uJesu uqobo wema phakathi kwabo, wathi: “Ukuthula makube kini.”

₃₇Kepha bona bethuka kakhulu, kwaphela nasozwaneni becabanga ukuthi babona umungcwi. ₃₈Wayesethi kubo: “Nethuswa yini na? Kungani ningabaza ezinhliziyweni zenu na? ₃₉Bhekani izandla zami nezinyawo zami ukuthi yiMina uqobo. Ngithinteni, nizibonele, ngokuba umungcwi awunanyama namathambo, njengokuba ningibona nginakho.”

₄₀Esekushilo lokho wabakhombisa izandla nezinyawo. ₄₁Kepha babengakholwa ngenxa yentokozo nokumangala, wathi kubo: “Ninakho yini ukudla lapha na?”

₄₂Bamnika iqatha lenhlanzi eyosiweyo. ₄₃Walithatha, walidla bebuka.

₄₄Wayesethi kubo: “Yiwo lawo mazwi engawakhuluma ngisenani, ngathi: ‘Kumele ukuba kugcwaliseke konke okulotshwe ngami emthethweni kaMose, kubaphrofethi, nasemaHubweni.’ ”

₄₅Wayeseyivula imiqondo yabo ukuze bayiqonde imibhalo. ₄₆Wathi kubo: “Kulotshiwe kanje ukuthi uKhristu uzakuhlupheka, avuke kwabafileyo ngosuku lwesithathu. ₄₇Kushunyayelwe egameni lakhe ukuphenduka, kube ngukuthethelelwa kwezono ezizweni zonke; kuqalwe eJerusalema. ₄₈Nina-ke ningofakazi balezi zinto. ₄₉Sengiyathumela kini isithembiso sikaBaba, kodwa hlalani emzini, nize nembathiswe amandla avela phezulu.”

₅₀Wayesebahola, baphuma baze bayofika eBhethaniya, waphakamisa izandla zakhe, wababusisa. ₅₁Kuthe esababusisa, wasuka kubo, wenyuselwa ezulwini. ₅₂Bakhuleka kuye, base bebuyela eJerusalema benokuthokoza okukhulu. ₅₃Babekhona njalo ethempelini, bemdumisa uNkulunkulu.