IZaga 19

₁Ungcono umuntu ompofu

ohamba ngobuqotho,

kunesiwula esikhuluma okuphambene ngezindebe zaso.

₂Futhi akukuhle ukuba umuntu

angabi nalwazi;

oshesha ngezinyawo uyaduka.

₃Ubuwula bomuntu buyayiguqula indlela yakhe,

kepha inhliziyo yakhe iyamthukuthelela uSimakade.

₄Ingcebo ikwenza ube nabangani abaningi,

kodwa ompofu ulahlwa

nangabangani bakhe.

₅Ufakazi wamanga akayukuyekwa angajeziswa,

nophafuza amanga akayukuphunyuka.

₆Baningi abazincengela ezikhulwini;

bonke bafuna ukuba ngumngani

womuntu ophanayo.

₇Ompofu uzondwa ngisho nayizihlobo zakhe;

kakhulu kangakanani-ke abangani bakhe?

Bayaziqhelelanisa naye;

noma efuna ukukhuluma nabo,

abatholwa ndawo.

₈Ozuza ukuqonda uthanda umphefumulo wakhe;

ogcina ukuqonda, ufumana okuhle.

₉Ufakazi wamanga akayukuyekwa angajeziswa,

nophafuza amanga uyobhubha.

₁₀Ukutamasa akusifanele isiwula,

kakhulu kangakanani-ke

ukuba inceku ibuse phezu kwezikhulu?

₁₁Ohlakaniphile uyephuza ukuthukuthela;

kuludumo lwakhe ukudlula esiphambekweni.

₁₂Ukuthukuthela kwenkosi kunjengokubhonga kwengonyama,

kepha isihe sayo sinjengamazolo otshanini.

₁₃Indodana eyisiwula, iyinhlupheko kuyise,

nomfazi ohlala ethetha uyiphela endlebeni.

₁₄Indlu nengcebo kuyifa elivela kubazali,

kodwa umfazi ohlakaniphileyo uvela kuSimakade.

₁₅Ubuvila buletha ubuthongo obunzima;

oyivila uyobulawa yindlala.

₁₆Ogcina umyalo ulonda umphefumulo wakhe,

kepha onganaki izindlela zakhe uyakufa.

₁₇Onomusa kompofu wetsheleka uSimakade;

uyakuthola umvuzo.

₁₈Yiyale indodana yakho lisekhona ithemba;

ungayifiseli ukuba ife.

₁₉Umuntu onolaka olukhulu wojeziswa;

uma umkhulula, uyophinde akwenze lokho.

₂₀Yizwa iseluleko,

wemukele ukuqondiswa,

ukuze ekugcineni uhlakaniphe.

₂₁Kukhona amacebo amaningi enhliziyweni yomuntu,

kepha inhloso kaSimakade iyokuma.

₂₂Okulangazelelwa ngumuntu ngukuba athembeke;

kungcono ukuba mpofu

kunokuba ube ngumuntu wamanga.

₂₃Ukumesaba uSimakade kuholela ekuphileni;

onakho uhlala enelisiwe,

akehlelwa ngokubi.

₂₄Ivila liyasifihla isandla salo esitsheni;

alisibuyiseli nasemlonyeni walo.

₂₅Sishaye isedeleli

ukuze ongenalwazi abe nokuqonda;

msole ohlakaniphileyo, uyakuzuza ulwazi.

₂₆Ohlukumeza uyise noxosha unina,

uyindodana ehlazisayo nebanga amahloni.

₂₇Ndodana yami,

uma uyeka ukulalela ukuyalwa,

uyakuduka emazwini okwazi.

₂₈Ofakaza okuyize wedelela umthetho;

umlomo wezikhohlakali ugwinya inkohlakalo.

₂₉Ukulahlwa kulungiselwe izedeleli,

nemivimbo, umhlane weziwula.