AMahubo 103

₁Mbonge uSimakade, mphefumulo wami,

konke okungaphakathi kimi

makulibonge igama lakhe elingcwele.

₂Mbonge uSimakade, mphefumulo wami,

ungaze wakhohlwa yimisebenzi yakhe yonke yomusa,

₃Yena othethelela zonke izono zakho,

owelapha zonke izifo zakho,

₄okhulula ukuphila kwakho ekubhujisweni,

okuqhelisa ngomusa nangobubele,

₅osuthisa ukulangazelela kwakho ngokuhle,

ubusha bakho bubuyiswe njengokhozi.

₆USimakade ubenzela bonke

abacindezelweyo ukulunga nobulungiswa.

₇Wamazisa uMose izindlela zakhe,

nabantu bakwa-Israyeli, izenzo zakhe.

₈USimakade unobubele nesihawu,

uyephuza ukuthukuthela, uvame umusa.

₉Akathethi njalonjalo,

akayigcini intukuthelo yakhe

kuze kube phakade.

₁₀Akasiphathi njengokufanele izono zethu,

akasivuzi njengokwamacala ethu.

₁₁Ngokuba njengokuphakama kwezulu phezu komhlaba,

unjalo umusa wakhe phezu kwabamesabayo.

₁₂Njengokuba impumalanga yahlukene nentshonalanga,

uzidedise kangako iziphambeko zethu.

₁₃Njengalokhu uyise ebahawukela abantwana bakhe,

kanjalo noSimakade uyabahawukela abamesabayo.

₁₄Ngokuba uyazi ukuthi sibunjwe kanjani,

uyakhumbula ukuthi siluthuli nje.

₁₅Izinsuku zomuntu zinjengotshani;

ukhahlela njengembali yasendle,

₁₆ipheshethwa ngumoya, bese inyamalala,

nendawo yayo ingabe isayazi.

₁₇Kepha umusa kaSimakade uphezu kwabamesabayo

phakade naphakade,

nokulunga kwakhe kubantwana babantwana,

₁₈abagcina isivumelwane sakhe,

bakhumbule ukwenza iziyalezo zakhe.

₁₉USimakade umise isihlalo sakhe

sobukhosi ezulwini,

umbuso wakhe ubusa

phezu kwakho konke.

₂₀Bongani uSimakade nina zingelosi zakhe,

nina maqhawe anamandla

enigcina izwi lakhe

nilalele okushiwo yilo.

₂₁Bongani uSimakade

nina mabandla akhe wonke,

nina zinceku zakhe

enenza intando yakhe.

₂₂Bongani uSimakade,

nina misebenzi yakhe yonke

ezindaweni zonke zombuso wakhe.

Mbonge uSimakade, mphefumulo wami.