AMahubo 22

₁Nkulunkulu wami,

Nkulunkulu wami,

ungishiyeleni na?

Ukude namazwi

okububula kwami

nokusindiswa kwami.

₂Nkulunkulu wami,

ngikhala emini,

kepha awuphenduli,

nasebusuku, ngingabi nakuthula.

₃Kepha Wena ungoNgcwele,

uhlezi ezibongweni zika-Israyeli.

₄Okhokho bethu bethembela kuwe;

bakwethemba, Wena wabakhulula.

₅Bakhala kuwe, bakhululwa;

bethembela kuwe, abaze bajabha.

₆Kepha mina angisemuntu,

ngiyimpethu nje;

ngiyisigcono sabantu,

nendelelo ezizweni.

₇Bonke abangibonayo bayangibhinqa,

banginkonkozele,

banikine amakhanda,

₈basho nokusho bathi:

“Makabeke indaba yakhe kuSimakade;

Yena makamkhulule.

Makamsindise ngoba uthokozile ngaye!”

₉Nguwe owangihlenga esibelethweni ngaze ngazalwa,

wangikhoselisa, ngavikeleka esifubeni sikamame.

₁₀Nganikelwa kuwe kwasekuzalweni kwami;

nguwe owaba nguNkulunkulu wami.

₁₁Ungabi kude nami,

ngokuba inhlupheko iseduze,

akekho ongisizayo.

₁₂Ngihaqwe yizinkunzi zaseBhashani

eziningi, ezinamandla, zingizungezile.

₁₃Zingikhamisele imilomo yazo

njengebhubesi elibhodlayo nelidwengulayo.

₁₄Ngichithiwe njengamanzi;

kuxega wonke amalungu ami.

Inhliziyo yami incibilika

njengengcina ezibilini zami.

₁₅Umlomo wami wome njengodengezi,

ulimi lunamathele olwangeni;

ungilalise othulini lokufa.

₁₆Ngokuba izinja zingihaqile,

umgwamanda wabenzi bokubi ungizungezile.

Izandla nezinyawo zami bazibhobozile.

₁₇Sengingawabala wonke amathambo ami.

Bangigqolozela, beklibhiza.

₁₈Behlukaniselana ngezingubo zami,

benza unkatho ngesembatho sami.

₁₉Kepha Wena Simakade, mawungabi kude,

Wena mandla ami, shesha ungisize.

₂₀Hlenga umphefumulo wami enkembeni,

impilo yami, esidladleni senja.

₂₁Ngisindise emlonyeni webhubesi,

nasezimpondweni zenyathi; uyangiphendula.

₂₂Ngiyomemezela ngegama lakho kubafowethu,

ngikudumise phakathi kwebandla.

₂₃Nina enesaba uSimakade, mdumiseni!

Nina nonke, bozalo lukaJakobe,

mdumiseni,

nani nonke, bozalo luka-Israyeli,

nimesabe,

₂₄ngokuba akamedelelanga,

akanengwanga yinhlupheko yohlushwayo.

Akamfihlelanga ubuso bakhe,

kodwa wamuzwa ngesikhathi enxusa.

₂₅Ukudumisa kwami kuyakuvela kuwe

ebandleni elikhulu,

izithembiso zami ngiyozifeza

phambi kwalabo abamesabayo.

₂₆Abahluphekayo bayokudla, basuthe;

labo abamfunayo uSimakade, bayomdumisa.

Sengathi izinhliziyo zenu

zingaphila ingunaphakade.

₂₇Yonke imikhawulo yomhlaba iyokhumbula,

bese iphendukela kuSimakade,

nayo yonke imindeni yezizwe

iyokhothama phambi kwakho;

₂₈ngokuba umbuso ungokaSimakade;

nguye obusa izizwe.

₂₉Bonke abomhlaba abacebileyo bayokudla, badumise,

nalabo asebewuthuli othulini,

bayokhothama phambi kwakhe,

ngisho nalowo ongenakuwugcina

umphefumulo wakhe uphilile.

₃₀Izizukulwane ziyomkhonza,

kulandwe ngayo iNkosi

isizukulwane ngesizukulwane.

₃₁Bayokuza bamemezele ngokulunga kwayo

kubantu abasazozalwa,

babatshele ukuthi lokho kwenziwa yiyo.