AMahubo 25

₁Simakade, ngiphakamisela kuwe umphefumulo wami.

₂Nkulunkulu wami, ngethembele kuwe;

ungavumi ukuba ngihlazeke;

izitha zami mazingaqhoshi ngami.

₃Impela, akuyukujabha noyedwa kwabathembele kuwe;

mabajabhe labo abaphambuka ngeze.

₄Simakade, ngazise izindlela zakho,

ungifundise imendo yakho.

₅Ngiholele eqinisweni lakho, ungifundise,

ngokuba Wena unguNkulunkulu wensindiso yami;

ngethembele kuwe njalo.

₆Simakade, khumbula umusa wakho kithi,

nesihawu sakho,

ngokuba kukhona kwaphakade.

₇Ungazikhumbuli izono zobusha bami

neziphambeko zami,

ngokwesihawu sakho ngikhumbule,

ngenxa yokulunga kwakho, Simakade!

₈USimakade muhle, ulungile,

yingakho izoni ezifundisa indlela.

₉Abathobekileyo ubaholela kokulungileyo,

abathobekileyo ubafundisa indlela yakhe.

₁₀Zonke izindlela zikaSimakade

ziyisihawu nokwethembeka

kulabo abagcina isivumelwano sakhe,

nobufakazi bakhe.

₁₁Simakade, ngenxa yegama lakho

ngithethelele isiphambeko sami,

ngokuba sikhulu.

₁₂Ngubani owesaba uSimakade na?

Uyomfundisa indlela okumele ayikhethe.

₁₃Uyophumelela njalo,

nezizukulwane zakhe ziyoba yizindlalifa zezwe.

₁₄USimakade ungumngani walabo abamesabayo,

ubafundisa ukuba basazi isivumelwano sakhe.

₁₅Amehlo ami ahlala ethe njo kuSimakade,

ngokuba nguye okhulula izinyawo zami ogibeni.

₁₆Bheka ngakimi, ube nomusa kimi,

ngokuba ngiyinhlwa, futhi ngiyahlushwa.

₁₇Ngikhulule ezinsizini ezisenhliziyweni yami,

ungikhiphe ezinhluphekweni engikuzo.

₁₈Bheka ukuhlupheka kwami nosizi lwami,

ungithethelele zonke izono zami.

₁₉Bheka ukuthi ziningi

kangakanani izitha zami,

nokuthi zingiphethe ngendlakandla

nangenzondo engakanani.

₂₀Londoloza umphefumulo wami,

ungikhulule,

ungavumi ngithelwe ngehlazo,

ngokuba mina ngiphephela kuwe.

₂₁Ukulunga nobuqotho makungilondoloze,

ngokuba ngethembele kuwe.

₂₂Nkulunkulu, khulula u-Israyeli

kuzo zonke izinkathazo zakhe.