AMahubo 35

₁Phikisana, Simakade, nabangiphikisayo,

yilwa nabalwa nami.

₂Thatha ihawu nesihlangu,

usukume ungisize.

₃Hosha umkhonto wakho,

uvimbe endleleni yabangizingelayo,

yithi enhliziyweni yami:

“Mina ngiyinsindiso yakho.”

₄Mabajabhe, balulazeke abazingela ukuphila kwami.

Mababuyiselwe emuva benxothozela

abaceba okubi ngami.

₅Mababe njengamakhoba epheshulwa ngumoya;

ingelosi kaSimakade ibadudule.

₆Indlela yabo mayibe mnyama, ishelele,

ingelosi kaSimakade ibahubhe.

₇Ngokuba bangakhele ugobe ngaphandle kwesizathu,

bayimbele umgodi impilo yami

ngaphandle kwesisusa.

₈Mabehlelwe yinhlekelele bengazelele,

ugibe abangigodlele lona

kukhalakathele bona kulo, babhujiswe.

₉Khona umphefumulo wami

uzakwethaba kuSimakade,

uthokoze ngokusindisa kwakhe.

₁₀Amathambo ami wonke athi:

“Simakade, ngubani onjengawe,

Wena ukhulula abantekenteke

kulabo abanamandla kunabo;

ohluphekayo nontulayo,

kulowo omphangayo.”

₁₁Ofakazi abaningi abayizidlova bangivukele,

bangibuza ngezinto engingazaziyo.

₁₂Okuhle engikwenzile bakubuyisela ngokubi,

inhliziyo yami bayiswabisile.

₁₃Kepha mina ngesikhathi begula,

ngangembethe ingubo eyisaka,

ngazihlupha ngokuzila ukudla,

ngakhuleka ngigobodisile,

ngaqinisela ekubakhulekeleni.

₁₄Ngangehla ngenyuka, kungathi ngizilele

umngani noma umfowethu,

ngakhothama, ngilila njengomuntu osebuhlubungwini

bokufelwa ngunina.

₁₅Kepha ekukhubekeni kwami, babuthana,

bahlekisa ngami;

ophumasilwe engingabazi bangithelekela,

bangishaya bangayeka.

₁₆Njengabantelayo abangakholwa,

bangigedlela amazinyo.

₁₇Nkosi kuyoze kube nini ubukela na?

Sindisa impilo yami ebudloveni babo,

ukuphila kwami emabhubesini!

₁₈Ngizokubonga ebandleni elikhulu,

ngikudumise phakathi kwabantu abaningi.

₁₉Mazingajabuli ngami izitha zami

eziphafuza amanga ngami,

nalabo abangizondela ize bacife amehlo.

₂₀Ngokuba abalukhulumi uxolo,

kepha baceba amacebo okukhohlisa,

babaqambele amanga abahleli ngokuthula emhlabeni.

₂₁Banginkonkozela kakhulu, bethi:

“Ashila, ashila, besivele sibona!”

₂₂Simakade, uyakubona;

mawungathuli, Nkosi,

mawungabi kude nami.

₂₃Phakama, usukumele ukwehlulelwa kwami,

uyimele indaba yami,

Nkulunkulu wami, Nkosi yami!

₂₄Simakade Nkulunkulu wami

ngahlulele ngokulunga kwakho,

mabangathabi ngami.

₂₅Bangathi ezinhliziyweni zabo:

“Ehhe, kuye ngesifiso sethu!”

“Simgwinyile.”

₂₆Makuthi bonke labo

abathabela okubi okungehlele,

bahlazeke, badumale.

Makuthi labo abazikhukhumeza ngami,

bathelwe ngehlazo,

bajabhe, balulazeke.

₂₇Mabethabe, bajabule abathokoza

ngokulunga kwami;

mabathi njalo njalo:

“Makadunyiswe uSimakade othokoza ngenhlalakahle

yenceku yakhe.”

₂₈Ulimi lwami luzoshumayela ngokulunga kwakho

nangodumo lwakho, usuku lonke.