AMahubo 38

₁Simakade, ungangijezisi ngolaka lwakho,

ungangishayi ngentukuthelo yakho.

₂Ngokuba imicibisholo ingigwaze yagxila;

isandla sakho singicindezele kanzima.

₃Akukho ukuphila emzimbeni wami,

ngenxa yentukuthelo yakho;

amathambo ami awanampilo,

ngenxa yesono sami.

₄Ngokuba iziphambeko zami

zedlula ikhanda lami,

zingisinda njengomthwalo onzima.

₅Izilonda zami zichicha ubomvu, ziyanuka,

ngenxa yobuwula bami.

₆Ngikhonkobele, ngithotshisiwe,

usuku lonke ngiyazulazula, ngilila.

₇Ukhalo lwami luyaqaqamba,

akukho mpilo emzimbeni wami.

₈Ngintekenteke, futhi ngitubeke kakhulu,

ngiyakhala, ngiyaquma

ngenxa yeminjunju enhliziyweni yami.

₉Nkosi, zonke izifiso zami ziphambi kwakho,

ukububula kwami akufihlakele kuwe.

₁₀Inhliziyo yami ishaya ngamandla,

umzimba ushona phansi,

kunqundeke amehlo.

₁₁Abangani nezihlobo zami bangihlubukile

ngenxa yokuhlupheka engikukho,

omakhelwane bami bahambela kude nami.

₁₂Abaqamekela ukuphila kwami bayangicupha,

abafuna ukungenzakalisa bakhuluma kabi ngami,

bazindla okubi ngami usuku lonke.

₁₃Kepha mina nginjengesithulu, angizwa,

nginjengesimungulu esingakwazi ukukhuluma.

₁₄Impela nginjengesithulu,

nanjengesimungulu esingawuvuli umlomo waso.

₁₅Ngethembele kuwe Simakade,

Wena Nkosi Nkulunkulu wami, uzongiphendula.

₁₆Ngokuba ngathi:

“Labo abazikhukhumeza ngami,

mabangajabuli ngami,

lapho unyawo lwami lushelela.”

₁₇Sengingawa noma yinini,

ubuhlungu bami buphambi kwami,

izikhathi zonke.

₁₈Ngiyasivuma isiphambeko sami,

ngiyazisola ngesono sami.

₁₉Izitha zami ziphilile, zinamandla,

baningi abangizondela ize;

₂₀abaphindisela okuhle ngokubi,

bengethwesa icala,

ngokuba mina ngenza okulungileyo.

₂₁Simakade, ungangishiyi,

Nkulunkulu wami

ungabi kude nami.

₂₂Phuthuma ungisize,

Nkosi, uyinsindiso yami.