AMahubo 50

₁UNkulunkulu uMninimandla wonke,

uSimakade uyakhuluma,

ubiza umhlaba kusukela

ekuphumeni kwelanga lize liyoshona.

₂EseZiyoni, ekupheleleni kobuhle bakhe,

uSimakade uqhakazile.

₃UNkulunkulu wethu uyeza, akayukuthula,

phambi kwakhe kunomlilo oqothulayo,

uphahlwe yisivunguvungu esinamandla.

₄Ubiza izulu ngaphezulu nomhlaba,

ukuba ahlulele isizwe sakhe:

₅“Buthelani kimi abathembekileyo bami,

abenza isivumelwano nami ngomhlatshelo.”

₆Amazulu amemezela ngokulunga kwakhe,

ngokuba uNkulunkulu ungumehluleli. Sela

₇“Lalelani, bantu bami, ngizokhuluma,

Israyeli, ngizomelana nani.

NginguNkulunkulu, uNkulunkulu wakho.

₈Ngenxa yemihlatshelo yakho, angiyukukujezisa,

ngokuba iminikelo yakho yokushiswa

iphambi kwami njalo.

₉Angiyukuthatha nkunzi endlini yakho,

nampongo ezibayeni zakho,

₁₀ngokuba zingezami zonke izilwane zehlathi,

nezinkomo eziyizinkulungwane ezisezintabeni.

₁₁Ngizazi zonke izinyoni ezisezintabeni,

nezilwane zasendle zaziwa yimi.

₁₂Ukuba bengilambile, bengingeke ngitshele wena,

ngokuba ungowami umhlaba wonke,

nakho konke okukuwo.

₁₃Mina ngizokudla inyama yezinkunzi,

ngiphuze igazi lezimpongo na?

₁₄Nikela kuNkulunkulu umnikelo wokubonga,

uzifeze izithembiso zakho kuye Ophezukonke,

₁₅ngibize ngosuku lwenhlupheko, ngiyakukukhulula,

wena uyakungidumisa.”

₁₆Kepha komubi, uNkulunkulu uthi:

“Yini ukuba ushumayele ngezimiso zami,

ukhulume ngesivumelwano sami,

₁₇ingani uyakuzonda ukuyalwa,

amazwi ami uwabukela phansi na?

₁₈Uma ubona isela,

uvumelana nalo,

neziphingi uhlanganyela nazo.

₁₉Umlomo wakho uwuyekela ebubini,

ulimi lwakho lubopha inkohliso.

₂₀Uhlala ugxibha umfowenu,

unyevuza indodana kanyoko.

₂₁Lokho ukwenzile, ngathula,

ushaye sengathi Mina nginjengawe;

ngizakukusola, ngikubeke icala.

₂₂“Nina enikhohlwa nguNkulunkulu,

kuqapheleni lokho,

funa nginidwengudwengule,

kungabi bikho onisindisayo.

₂₃Onikela ngomnikelo wokubonga uyangidumisa,

oqaphela indlela yakhe

ngiyakumbonisa insindiso kaNkulunkulu.”