AMahubo 92

₁Kuhle ukubonga uSimakade,

nokuhubela igama lakho,

Wena oPhezukonke,

₂ukumemezela umusa wakho ekuseni,

nokwethembeka kwakho ebusuku,

₃nokushaya ugubhu olunezintambo ezilishumi,

umqangala nohabhu okuzwakala kamnandi.

₄Ngokuba Wena, Simakade,

ungithokozisile ngemisebenzi yakho.

Ngizohuba ngentokozo ngemisebenzi yezandla zakho.

₅Simakade, yeka ubukhulu

bemisebenzi yezandla zakho!

Imicabango yakho ijule kakhulu.

₆Umuntu oyisiwula akanalwazi,

nesiphukuphuku asikuqondi lokhu.

₇Ngisho izikhohlakali zingahluma njengotshani,

nabo bonke abenza okubi baqhakaze,

bayobhubha ingunaphakade.

₈Kepha Wena, Simakade, uphakeme

kuze kube phakade.

₉Ngokuba izitha zakho, Simakade,

izitha zakho ziyakubhubha,

bonke abenza okubi bayakuhlakazwa,

₁₀kodwa udumo lwami uluphakamise lwanjengophondo lwenyathi,

ngagcotshwa ngamafutha amasha.

₁₁Iso lami liyakuzibona

ngokujabula izitha zami,

nezindlebe zami ziyakuzwa ngokuthokoza

ngabenzi bokubi abangivukelayo.

₁₂Olungileyo uhluma njengesundu,

akhule njengomsedari eLebhanoni.

₁₃Batshalwe endlini kaSimakade,

bamilile emagcekeni kaNkulunkulu wethu.

₁₄Nalapho sebebadala bayakuthela izithelo,

bahlume babe luhlaza,

₁₅ukuze bamemezele ukuthi uSimakade ulungile,

uyidwala lami, kuye akukho ukungalungi.