USirakhi 19

₁Owenza lokho kasoze aceba; nalowo obukela phansi izinto ezincane uyokwehluleka awe kancane kancane. ₂Iwayini nesifazane kudukise izihlakaniphi, kanjalo nendoda ehlala ingungwe yizifebe iyidlabha lempela. ₃Ukubola nezimpethu kuyisabelo sakhe kanjalo nomuntu oyidlabha uyakushabalala. ₄Lowo owethemba abanye ngokushesha unomqondo ongazikile, nalowo owenza isono wenza okubi kuye uqobo. ₅Lowo othokoza ebubini uyakubhujiswa, kodwa lowo omelana nezinjabulo, uthwesa impilo yakhe umqhele.

₆Lowo ofaka ulimi lwakhe amatomu uyophila ngaphandle kwenxushunxushu kodwa lowo ozonda inhlebo, unobubi obuncane. ₇Ungalokothi uyiphinde ingxoxo, ngokwenze njalo awuyikulahlekelwa lutho nempela. ₈Lapho unomngane noma isitha ungaze waxoxa ngalokho, ngaphandle kokuba kungaba yisono kuwe, ungaze wakuveza ebenixoxa ngakho, ₉ngokuba kunokwenzeka ukuba ukhona okuzwile futhi obekubhekile, okuyothi ngokuhamba kwesikhathi akuzonde. ₁₀Kukhona okuzwileyo, yana egodini nakho. Yiba nesibindi, awunakuqhuma! ₁₁Lapho isiwula sesizwile okuthile, siba nezinseka njengowesifazane ehelelwa lapho ezobeletha. ₁₂Njengo mcibisholo ombeleke ethangeni lomuntu, injalo inhlebo esifubeni sesiwula. ₁₃Mbuze umngani, ngoba kunokwenzeka ukuthi kakwenzanga lokho; uma ekwenzile, msole ukuze angaphinde akwenze. ₁₄Mbuze umakhelwane, ngoba kungenzeka ukuba kazange akusho lokho; uma ekushilo, msole ukuze angakuphindi.

₁₅Mbuze umngani, ngokuba isikhathi esiningi kusuke kungumoya womubi; ungakholwa yikho konke okuzwayo. ₁₆Kuyenzeka umuntu enze iphutha engaqondile. Ubani ongakaze one ngolimi lwakhe na? ₁₇Mbuze umakhelwane wakho ngaphambi kokuba umsongele; futhi yekela umthetho woPhezukonke uthathe indawo yawo, futhi ungathukutheli. ₁₈Ukwesaba uSimakade kungukuqala kokwamukeleka futhi inhlakanipho izuza uthando lwakhe. ₁₉Ulwazi ngomthetho kaSimakade lunika impilo nobuqotho; labo abenza okumthokozisayo uSimakade bayakudla isithelo somuthi wokuphila okuphakade.

₂₀Inhlakanipho yonke ingukwesaba uNkulunkulu, futhi enhlakanipheni kukhona ukugcwaliseka komthetho nokumazi onguMninimandla onke. ₂₁Uma isiqgila sithi kumniniso: “Anginakwenza njengokuthanda kwakho” noma sesingakwenza kamuva, simthukuthelisile lowo osondlayo. ₂₂Akuyona inhlakanipho ukwazi ukonakala, futhi akukho kucophelela ezelulekweni zezoni. ₂₃Kukhona ubuhlakani obenyanyisayo, futhi kukhona nesilima eseswele inhlakanipho. ₂₄Bangcono kakhulu labo abeswele ukuqonda kodwa bemesaba uNkulunkulu kunabakhaliphe kakhulu bebe bephula umthetho. ₂₅Kukhona ukuhlakanipha okushaya emhlolweni kube kungenabulungisa, kukhona nabantu abasebenzisa kabi okuhle abakwenzelwayo ukuze bavunwe yisinqumo. ₂₆Nanti iqili lithotshisiwe lilila, kodwa ngaphakathi ligcwele ububi. ₂₇Lifihla ubuso balo lenze sengathi kalizwa, kodwa lapho kungekho obonayo, liyakudlala ngawe. ₂₈Nakuba ukweswela amandla kungalivimbela ekoneni, nokho liyakubenza ububi lapho lithola ithuba. ₂₉Umuntu waziwa ngendlela abukeka ngayo, kanti futhi umuntu onengqondo waziwa kahle lapho usumbone ubuso nobuso. ₃₀Imvunulo yomuntu, ukuhleka kwakhe kanye nendlela ahamba ngayo, kukhomba lokho umuntu ayikho.