USirakhi 2

₁Mntanami, uma ulangazelela ukuba yisikhonzi seNkosi, zilungiselele ukuvivinywa. ₂Bamba indlela eqondile ume kuyo, ungadikibali ngezikhathi zobunzima. ₃Bambelela kuye ungasuki ukuze izinsuku zakho zigcine ngobuhle. ₄Yamukela noma yini ekwehlelayo ubekezele ngezikhathi zobunzima, nezokudunyazwa. ₅Ngokuba igolide lihlanzwa emlilweni, kodwa abakhethiweyo esithandweni sokudunyazwa. ₆Methembe, uyakukusiza, hamba uqonde, ubeke ithemba lakho kuye. ₇Nina enesaba uSimakade lindelani umusa wakhe, ningaphambuki funa niwe. ₈Nani enimesabayo uSimakade, methembeni, khona ningekulahlakelwa ngumvuzo wenu. ₉Nina enimesabayo uSimakade, lindelani okuhle, intokozo engapheli nesisa.

₁₀Bhekani izizukulwane zasendulo, nibone: Ukhona yini owethembela kuSimakade wadunyazwa na? Ukhona yini owema waqina ekumesabeni ake wamlaxaza na? Ngubani oke wakhala kuye akamuzwa na? ₁₁Ngokuba iNkosi inesisa nesihawu; ithethelela owonile futhi isindise ngesikhathi sokuhlupheka. ₁₂Maye! Kuzo izinhliziyo ezinobugwala, nezandla ezingenasibindi, nakuso isoni esimpilo yaso imbaxambili. ₁₃Maye! Kubo abanhliziyo ingenathemba! Inhliziyo engenalo ukholo iyohamba ingavikelekile. ₁₄Maye! Kini eseniyeke ukuzabalaza! Niyokwenze njani ekufikeni kweNkosi na? ₁₅Labo abayesabayo iNkosi abaweqi neze amazwi ayo; nalabo abayithandayo, bahamba ezindleleni zayo.

₁₆Abayesabayo iNkosi benza intando yayo, nabo bonke abayithandayo bagxila emthethweni wayo. ₁₇Labo abayesabayo iNkosi balungisa izinhliziyo zabo, bazithobe phambi kwayo bathi: ₁₈“Kungcono ukuwela ezandleni zeNkosi kunokuwela ezandleni zabantu, ngokuba ubukhosi bayo bulingana nesihawu sayo, nemisebenzi yayo ilingana negama layo.”