USirakhi 8

₁Ungaphikisani nabanamandla funa uwele ezandleni zabo. ₂Ungaxabani nabacebileyo funa bakwehlule ngengcebo yabo, ngokuba igolide libhubhise iningi ladukisa izinhliziyo zamakhosi. ₃Ungaphikisani nomuntu okhulumela futhi funa ufane nothela amafutha emlilweni ovuthayo. ₄Ungahlekisi ngomuntu ongakhulisekanga kahle ngoba ungahle uthuke okhokho bakho. ₅Ungasiklolodeli isoni esiphendukayo; khumbula ukuthi sonke sifanele ukujeziswa. ₆Ungameyi umuntu omdala ngoba nathi sizoguga maduze nje. ₇Ungakujabuleli ukufa komunye, khumbula ukuthi sonke sifanelwe ukufa. ₈Ungazideleli izingxoxo zabahlakaniphileyo, kodwa zihluphe ngabakushoyo ngokuba kukho uyofumana ukuqondiswa ufunde ukuthi zikhonzwa kanjani izikhulu.

₉Ungazishayi indiva izindlela zabadala, ngoba nabo bazifunda koyise; nawe uyofunda kubo ukuqonda nokuphendula uma kuvela isidingo. ₁₀Ungokheli amalahle ezoni funa ushe eklobeni lomlilo wazo. ₁₁Ungavumeli izedeleli zikubukele phansi, ukuze zingakwakheli uzungu lokukubulala ngenkemba. ₁₂Ungamboleki umuntu onamandla kunawe, uma umboleke okuthile kuthathe njengento ekulahlekele. ₁₃Ungasenzi isibambiso esingaphezu kwamandla akho, uma usenzile zimisele ukukhokha.

₁₄Ungamangalelani nomahluleli; ngokuba isinqumo siyovuna yena ngenxa yesikhundla sakhe. ₁₅Ungaluthathi uhambo nabantu ababudedengu, ngokuba bayoba ngumthwalo emahlombe akho; bayozenzela umathanda, kuthi nangenxa yobuthutha babo ubhubhe kanye nabo. ₁₆Ungaxabani nabantu abanolaka noma uhambisane nabo unqamule ugwadule, ngoba kabakushayi-mkhuba ukuchitha igazi, kuthi nxa lungafumaniseki usizo baphendukele wena. ₁₇Ungazidaluli izimfihlo zakho esithutheni ngoba kasinasifuba. ₁₈Ungenzi lutho oluyimfihlo phambi kwezihambi, ngoba awukwazi ezizokudalula. ₁₉Ungakusho konke okusenhliziyweni yakho kuwo wonke umuntu funa uqede ukuthokoza kwakho.