UISAYA 16

₁Thumani amawundlu ombusi wezwe

aphume eSela ngasehlane,

aye entabeni yendodakazi yaseSiyoni.

₂Kuyakuthi njengezinyoni ezizulazulayo,

njengamaphuphu ahlakazekileyo,

abe-njalo amadodakazi akwaMowabi emazibukweni aseArinoni.

₃Lulekanani, nenze izinqumo,

ubeke isithunzi sakho njengobusuku

phakathi kwemini,

nithukuse abaxoshiweyo,

ningadaluli ababalekileyo.

₄Abaxoshiweyo bakwaMowabi mabahlale kuwe;

mawube-yisivikelo kubo ebusweni bomchithi.

Lapho umcindezeli esephelile,

nokuchitha sekuyekiwe,

nabanyathelayo sebeqediwe ezweni,

₅kuyakumiswa isihlalo sobukhosi ngomusa,

kuhlale kuso ngeqiniso

etendeni likaDavide

umahluleli efuna ukwahlulela esheshisa ukulunga.

₆Sizwile ngokuziphakamisa kukaMowabi

ukuthi uphakeme kakhulu,

nangokuzidla kwakhe nokuziqhenya kwakhe nentukuthelo yakhe

nokuphafuza kwakhe okuzenzisayo.

₇Ngalokho uMowabi uyakuhewula ngoMowabi;

bonke bayakuhewula.

Niyakukhala ngezigaxa zezithelo zomvini ezomileyo zaseKhiri-Haresheti

nidabukile kakhulu.

₈Ngokuba amasimu aseHeshiboni abunile

kanye nomvini waseSibima;

amakhosi ezizwe achithile amagatsha awo;

afinyelela naseJazeri, edukela nasehlane;

amahlumela awo elulwa, awela ulwandle.

₉Ngalokho ngiyakukhalela umvini waseSibima

njengokukhala kweJazeri,

ngikumatise, Heshiboni, ngezinyembezi zami,

nawe-Elehale,

ngokuba phezu kwezithelo zakho nokuvuna kwakho

kuwile ukumemeza kwempi.

₁₀Ukuthokoza kususiwe kanye nokujabula ensimini;

nasezivinini akuhlatshelelwa, akujatshulwa;

abanyathelayo abalinyatheli iwayini ezikhamweni;

ngenzé ukuba kuphele ukumemeza.

₁₁Ngalokho inhliziyo yami iyakhala njengehabhu* ngoMowabi,

nokuphakathi kwami ngeKhiri-Heresi.

₁₂Kuyakuthi lapho uMowabi esebonakala,

azikhathaze endaweni ephakemeyo,

aye endlini yakhe engcwele ukuba athandaze,

angaphumeleli.