UISAYA 65

₁Ngafunwa ngabangangicelanga,

ngafunyanwa ngabangangifunanga,

ngathi: Ngibhekeni, ngibhekeni,

kuso isizwe esingabizwanga ngegama lami.

₂Ngizelulile izandla zami usuku lonke kubantu abahlubukayo,

abahamba ngendlela engenhle

nangokwemicabango yabo,

₃abantu abangithukuthelisa ebusweni bami njalo,

behlabela ezivandeni,

beshisa impepho phezu kwezitini,

₄abahlala emathuneni,

balale ezindaweni ezisithekileyo,

badle inyama yezingulube,

benomhluzi wezinto ezinengekayo ezitsheni zabo,

₅abathi: Hlehla, ungasondeli kimi,

ngokuba ngingcwele kuwe;

banjengomusi emakhaleni ami,

umlilo ovutha usuku lonke.

₆Bheka, kulotshiwe phambi kwami ukuthi:

Angiyikuthula, ngiyakuphindisela,

yebo, ngiphindisele ezifubeni zabo

₇ububi babo nobubi bawoyise kanyekanye, usho uJehova,

abashisa impepho ezintabeni,

bangihlambalaza emagqumeni;

ngiyakulinganisa kuqala umvuzo wabo

ezifubeni zabo.

₈Usho kanje uJehova, uthi:

Njengalokhu iwayini litholwa ehlukuzweni,

besekuthiwa: Malingachithwa,

ngokuba isibusiso sikulo,

kanjalo ngiyakwenza ngenxa yenceku yami:

angiyikubabulala bonke.

₉Ngiyakuveza inzalo kuJakobe,

nendlalifa yezintaba zami kuJuda;

abakhethiweyo bami bayakulidla,

nezinceku zami ziyakwakha khona.

₁₀ISharoni liyakuba-yisibaya sezimvu,

nesiGodi saseAkori indawo yokubuthisa kwezinkomo

kubantu bami abangifunayo.

₁₁Kepha nina enimshiya uJehova,

nikhohlwe intaba yami engcwele,

nihlelele iNhlanhla* itafula,

nigcwalisele isiMiselo* iwayini elixutshanisiweyo,

₁₂ngiyakuninqumela inkemba,

nikhothamele nonke ukuhlatshwa,

ngokuba lapho nganibiza, aniphendulanga,

nalapho ngakhuluma, anizwanga,

kepha nenza okubi emehlweni ami,

nakhetha lokhu engingathokozanga ngakho.

₁₃Ngalokho isho kanje iNkosi uNkulunkulu, ithi:

Bhekani, izinceku zami ziyakudla, kepha nina niyakulamba;

bhekani, izinceku zami ziyakuphuza, kepha nina niyakoma;

bhekani, izinceku zami ziyakuthokoza, kepha nina niyakujabha;

₁₄bhekani, izinceku zami ziyakujabula ngokwenama kwenhliziyo,

kepha nina niyakuhewula ngokwaphuka komoya,

nikhale ngobuhlungu benhliziyo.

₁₅Niyakulishiya igama lenu libe-yisiqalekiso kwabakhethiweyo bami,

iNkosi uJehova inibulale,

izibize izinceku zayo ngelinye igama,

₁₆ukuze kuthi ozibusisa emhlabeni

azibusise kuNkulunkulu weqiniso,

nofunga emhlabeni,

afunge uNkulunkulu weqiniso,

ngokuba izinhlupheko zakuqala zikhohlakele

nangokuba zisithele emehlweni ami.

₁₇Ngokuba bheka, ngiyadala izulu elisha nomhlaba omusha;

izinto zakuqala aziyikukhunjulwa,

zingene enhliziyweni.

₁₈Kepha jabulani, nethabe kuze kube-phakade ngengikudalayo,

ngokuba bheka, ngilidala iJerusalema libe-ngukwethaba,

nabantu balo babe-yinjabulo.

₁₉Ngiyakwethaba ngeJerusalema,

ngijabule ngabantu bami,

kungabe kusezwakala izwi lokulila

nezwi lokukhala.

₂₀Kusukela lapho akusayikuba-khona

ingane yezinsuku nje

nexhegu elingazigcwalisanga izinsuku zalo,

ngokuba omusha uyakufa eneminyaka eyikhulu yobudala,

isoni siqalekiswe sineminyaka eyikhulu.

₂₁Bayakwakha izindlu, bahlale kuzo;

bayakutshala izivini, badle izithelo zazo.

₂₂Abayikwakha, kuhlale omunye;

abayikutshala, kudle omunye,

ngokuba izinsuku zabantu bami

ziyakuba-njengezinsuku zomuthi,

nomsebenzi wezandla zabakhethiweyo bami

uyakugugela kubo.

₂₃Abayikushikashikela ize,

bazalele izinhlupheko,

ngokuba bayinzalo yababusisiweyo bakaJehova,

nabantwana babo bayakuba-nabo.

₂₄Kuyakuthi bengakangibizi, mina ngiphendule;

besakhuluma, mina ngiyakuzwa.

₂₅Impisi iyakudla ndawonye newundlu,

ingonyama idle utshani njengenkomo,

uthuli lube-ngukudla kwenyoka;

aziyikulimaza, zingachithi kuyo yonke intaba yami engcwele, usho uJehova.