ABAHLULELI 5

₂Ngokuba abaholi beholile kwaIsrayeli,

ngokuba abantu bezinikela ngenhliziyo,

bongani uJehova.

₃Yizwani nina-makhosi; bekani indlebe nina-zikhulu;

mina, yebo, mina ngiyakuhlabelela kuJehova,

ngihubele kuJehova uNkulunkulu kaIsrayeli.

₄Jehova, ekuphumeni kwakho eSeyiri,

ekusukeni kwakho ezweni akwaEdomi

umhlaba wazamazama, namazulu aconsa,

yebo, amafu aconsa amanzi.

₅Izintaba zathuthumela ebusweni bukaJehova,

yebo, nalo iSinayi lelo,

ebusweni bukaJehova uNkulunkulu kaIsrayeli.

₆Ezinsukwini zikaShamgari indodana ka-Anati,

ezinsukwini zikaJayeli imendo yayishiyiwe;

ababeyakuhamba ngemendo bahamba ngemikhondo.

₇Abaholi baphela kwaIsrayeli, banqamuka,

ngaze ngavuka mina-Debora,

ngavuka ngingunina kwaIsrayeli.

₈Bakhetha onkulunkulu abasha;

lapho kwafika impi emasangweni;

kwabonwa isihlangu noma umkhonto yini

phakathi kwezinkulungwane ezingamashumi amane kwaIsrayeli na?

₉Inhliziyo yami ikubabusi bakwaIsrayeli

abazinikelayo ngenhliziyo phakathi kwabantu;

bongani uJehova.

₁₀Nina enigibela izimbongolo ezimhlophe,

nina enihlezi emacansini,

nani enihamba ngendlela, kulandeni.

₁₁Ekwahlukaniseni impango phakathi kwemiqengqe yamanzi

balanda khona izenzo ezilungileyo zikaJehova,

ukulunga kokubusa kwakhe kwaIsrayeli;

khona abantu bakaJehova behlela emasangweni.

₁₂Vuka, vuka, Debora!

Vuka, vuka, uhube ihubo!

Vuka, Baraki, uthumbe abathunjwa bakho,

wena-ndodana ka-Abinohama!

₁₃Khona wayenza insali ukuba ibuse abakhulu;

abantu bakaJehova bangibeka ukuba ngibuse iziqhwaga.

₁₄Kwavela kwaEfrayimi abampande yabo ikuma-Amaleki;

emva kwakho nguBenjamini phakathi kwabantu bakho.

KwaMakiri kwavela ababusi, kwaZebuloni abaphethe intonga yomholi.

₁₅Izikhulu zakwaIsakare zazinaye uDebora;

njengoIsakare, kanjalo noBaraki;

behlela ngokushesha esigodini ezinyathelweni zakhe.

Ngaseminonjaneni yakwaRubeni

kwakukhona ukululekana okukhulu kwenhliziyo.

₁₆Wahlalelani ezibayeni zezimvu

ukuzwa ikhwelo lemihlambi na?

Ngaseminonjaneni yakwaRubeni

kwakukhona ukululekana okukhulu kwenhliziyo.

₁₇UGileyadi wahlala phesheya kweJordani;

uDani walibalelani emikhunjini na?

UAsheri wahlala ngasogwini lolwandle,

wasala ngasemathekwini akhe.

₁₈UZebuloni wayengabantu abazidela kwaze kwaba-sekufeni,

uNafetali kanjalo ezindaweni eziphakemeyo zezwe.

₁₉Amakhosi afika alwa,

alwa amakhosi aseKhanani

eThahanaki ngasemanzini aseMegido;

awathathanga-nzuzo yamali.

₂₀Kwaliwa ezulwini;

izinkanyezi ezindleleni zazo zalwa noSisera.

₂₁Umfudlana iKishoni wabakhukhula,

umfudlana wamandulo, umfudlana iKishoni.

Awu, mphefumulo wami, nyathela ngamandla.

₂₂Khona zadubuza izinselo zamahashi

ngokugadula, ukugadula kwezinkweli zawo.

₂₃Qalekisani iMerozi, kwasho ingelosi kaJehova;

qalekisani nokuqalekisa abantu balo,

ngokuba abezanga ukumsiza uJehova

ukuba bamsize uJehova ukulwa neziqhwaga.

₂₄Uyakubusiswa phezu kwabesifazane uJayeli

umkaHebere umKheni,

abusiswe phezu kwabesifazane basematendeni.

₂₅Wacela amanzi, wamupha ubisi,

wamlethela amangqanga ngesitsha samakhosi.

₂₆Wafaka isandla sakhe esikhonkwaneni,

esokunene sakhe esandweni sezisebenzi;

ngesando wamshaya uSisera,

wadebeza ikhanda lakhe,

yebo, wamgqobhoza, wambhoboza esikhaleni sendlebe.

₂₇Wakhothama ngasezinyaweni zakhe, wawa, walala;

ngasezinyaweni zakhe wafola, wawa;

lapho wakhothama khona, wawela khona efile.

₂₈Wabheka efasiteleni, wamemeza,

unina kaSisera wathi eheleni:

Inqola yakhe ilibalelani ukufika na?

Zilibaziselwani izinyawo zezinqola zakhe na?

₂₉Amakhosazana akhe ahlakaniphileyo amphendula,

yebo, wazibuyisela yena uqobo impendulo ngokuthi:

₃₀Angithi batholile babelana impango?

Intombi, yebo, izintombi ezimbili endodeni ngayinye;

kuSisera impango yezingubo ezinemibala,

impango yezingubo ezinemibala ezifekethisiweyo;

izingubo ezimbili ezinemibala ezifekethisiweyo zezintamo zabayimpango.

₃₁Mazibhubhe kanjalo zonke izitha zakho, Jehova;

kepha abamthandayo mababe-njengelanga, lapho liphuma ngamandla alo.