UJOWELI 1

₁Izwi likaJehova elafika kuJoweli indodana kaPhethuweli.

₂Yizwani lokhu nina-badala,

nibeke indlebe nina nonke enihlezi ezweni.

Kwake kwaba-khona emihleni yenu

noma emihleni yawobaba na?

₃Kutsheleni abantwana benu,

nabantwana benu abantwana babo,

nabantwana babo esinye isizukulwane.

₄Okushiywé yisibotho

kudliwe yisikhonyane,

nokushiywé yisikhonyane

kudliwe yizinkumbi,

nokushiywé yizinkumbi

kudliwe yinkasa.

₅Phaphamani, zidakwa, nikhale,

nihewule nonke eniphuza iwayini

ukuthi iwayini linqanyulelwe emlonyeni wenu.

₆Ngokuba kwenyukele ezweni lami

isizwe esinamandla nesingenakubalwa;

amazinyo aso angamazinyo engonyama,

namazinyo aso emihlathi angawengonyamakazi.

₇Sichithile umvini wami,

saxebula umkhiwane wami;

siwuxhozile nokuwuxhoza,

sawulahla,

amagatsha awo sawenza aba-mhlophe.

₈Khala njengentombi ebhincé indwangu yamasaka

ngomyeni wobusha bayo.

₉Iminikelo yempuphu neminikelo yokuphuzwa inqamukile endlini kaJehova;

abapristi, izikhonzi zikaJehova, bayalila.

₁₀Amasimu achithekile,

umhlabathi uyalila,

ngokuba amabele achithiwe;

iwayini elisha lishile, amafutha ayawuma.

₁₁Jabhani, balimi, nihewule nina-baphathi bezivini

ngokolweni nangebhali*,

ngokuba isivuno samasimu sichithakele.

₁₂Umvini ubunile,

imikhiwane iwumile;

imipomegranati*, namasundu, nemi-apula*,

nemithi yonke yasendle kubunile,

ngokuba intokozo ibunile

phakathi kwamadodana abantu.

₁₃Bhincani, nikhale, bapristi,

nihewule, nina-zikhonzi zealtare;

wozani nilale bonke ubusuku ezindwangwini zamasaka, zikhonzi zikaNkulunkulu wami,

ngokuba iminikelo yempuphu neminikelo yokuphuzwa kugodliwe endlini kaNkulunkulu wenu.

₁₄Ngcwelisani ukuzila ukudla,

nibize umhlangano;

buthani amalunga,

yebo, bonke abakhé ezweni,

endlini kaJehova uNkulunkulu wenu,

nikhale kuJehova.

₁₅Hawu lolosuku!

Ngokuba usuku lukaJehova lusondele,

lufika njengokuchitha kuvela kuSomandla.

₁₆Akunqunywanga ukudla kwethu phambi kwamehlo ethu,

intokozo nenjabulo endlini kaNkulunkulu wethu, na?

₁₇Imbewu iyabola phansi kwamagade ayo;

izingobo zichithakele,

izinqolobane zidiliziwe,

ngokuba amabele omile.

₁₈Yeka, ukububula kwezilwane!

Imihlambi yezinkomo ikhungathekile,

ngokuba ayinadlelo,

yebo, nemihlambi yezimvu izithwesé icala.

₁₉Ngikhala kuwe-Jehova, ngokuba amadlelo asehlane adliwe ngumlilo,

nelangabi lishisile yonke imithi yasendle.

₂₀Yebo, nezilwane zasendle ziyakulangazelela,

ngokuba imifula yamanzi ishile,

nomlilo udlile

amadlelo asehlane.